Urang Ende

Urang Ende adolah suku banso di Indonesia nan badiam di bagian tangah Pulau Flore, Kabupaten Ende, Nusa Tenggara Timur jo lueh wilayah 2.046,59 km². Kato Ende dipakirokan barasa dari kato cindai nan artinyo kain sutra nan babungo-bungo.^[1] Populasi Urang Ende pado tahun 2020 sakitar 300.000 orang nan tasebar di wilayah Kabupaten Ende jo sabagian Nagekeo.^[2]

Sacaro geografis Kabupaten Ende mampunyoi latak nan cukuik strategih yaitu di bagian tangah Pulau Flores nan dikapik dek ampek kabupaten di bagian baraik: Nagekeo, Ngada, Manggarai, dan Manggarai Baraik, sadangkan di bagian timua jo duo Kabupaten yakni Kabupaten Sikka jo Kabupaten Flores Timua.^[3]

Wilayah asa urang Ende dibagi manjadi tigo wilayah yaitu kacamatan Nangapanda, Ende, jo Ndona. wilayah asa urang Ende iko batatanggo jo wilayah-wilayah kadiaman suku banso Nagekeo disabalah baraik, jo wilayah kadiaman suku banso Lio di sabalah Timua. lingkuangan alam dari wilayah asa suku banso iko marupokan wilayah bagunuang jo bukik balakuak-lakuak tajam jo jarang disobokkan lahan basah.

Sakitar 85% Urang Ende tautamo nan tingga di dataran tinggi manganuik Katolik Roma jo sakitar 15% manganuik Islam tautamo di wilayah pasisia kota Ende. ^[2]

Tambi uma adolah salah ciek kaarifan lokal masyarakaik Urang Ende nan barado di Kabupaten Ende Propinsi Nuso Teaggaro Timua. Arti Tambi uma dalam bahaso Indonesia adolah mancangkua parak. Tambi uma alah dihiduiki jo dilakukan dek masyarakaik satampek subagai salah ciek bantuak kagiatan gotong royong nan sarat jo nilai padunsanakan jo Pasatuan. Tradisi iko manjadi salah ciek wadah bagi masyarakaik untuak bakarajo samo dalam bidang patanian. Tambi uma dilaksanokan dalam rangko mampasiapkan lahan untuak mananam padi, jaguang, umbi-umbian, sayuaran atau pun kacang-kacangan. Tambi uma dilakukan sacaro kalumpok baiak dalam kalumpok ketek maupun dalam kalumpok gadang. Kalumpok Tambi uma basipekheterogen dimano tadiri dari laki-laki jo padusi. Kagiatan Tambi uma dilakukan dari pagi hari sampai sore hari, tapi uniaknyo mampunyoi jeda istirahaik di siang hari. Sistem dalam

tradisi Tambi uma manyarupoi kagiatan arisan, dimano ka tajadi pagiliran pakarajoan untuak mancangkua parak hinggo sado angguta kalumpok mandapekan gilirannyo. Tradisi Tambi uma ko manjadi tampek juo untuak manyadiokan jasa bagi patani lain dalam mancangkua parak.^[4]

Nggua marupokan alek adaik nan sangaik pantiang dalam kabudayoan urang Ende. Intensi dari alek adaik nggua banuanso syukua ateh hasil panen. Alek adaik nggua indak basipek inklusif, karabaik jo angguta kaluargo nan barado di lua suku buliah ikuik ambiak bagian. Biasonyo momen alek adaik nggua manjadi saaik di mano kaluargo gadang bakumpua jo manjalin kaakraban. Simbol dari kaakraban itu adolah tarian Gawi. Upocaro nggua balangsuang dalam kabasamoan. Satiok angguta suku ikuik ambiak bagian dalam nado syukua jo suko cito. Mereka saliang mambagikan hasia jariah payah jo maagiahan nan tabaiak untuak dihidangkan. Sacaro sosiologis upocaro adaik nggua manunjuakkan sabuah kahiduikan manusio di dunia iko. Sijarah kabaradoan manusio Ende indak talapeh dari masyarakaik adaik nan akrab jo alam. Tradisi ritual nggua bakaikan arek jo tujuan kahiduikan manusio itu surang yakni kasajahtaroan. Ritual adaik nggua indak talapeh dari mitologi ana halo (anak yatim piatu).^[5]

Urang Ende mampunyoi upocaro panikahan adaik cukuik panjang jo mamakan wakatu lamo, bahkan babulan-bulan sarto mampunyoi tato caro nan khas. Satiok tahapan nan ka dilalui tadiri juo dari babarapo rangkaian acaro sarupo temba zaza, ngambe, buku nai ono jo pelulu, bhaze duza, wa'u ngao, wa'u sodho, minu ae petu, balanjo mendhi, tandi nyamuak jariang, pa'i laka, tu atau nika/jeju.

1. Temba zaza

Temba Zaza atau patimbangan adolah kunjuangan awa urang tuo utuihan laki-laki ka rumah pihak padusi. Temba Zaza surang marupokan tahap pangukuahan, sahinggo sacaro adaik kalau dicaliak dari hubuangan pacaran (bukan ta’aruf) baiak urang tuo pihak laki-laki maupun padusi, kaluargo, tatanggo hinggo kawan-kawan indak paralu mampatanyokan siapo jo baa laki-laki jo padusi iko acok basamo-samo. Saaik Temba Zaza utuihan urang tuolaki-laki ka mambawo aneka kudokan jo buah-buahan nan dilatakkan di ateh talam-talam. Satalah itu, bisa jadi kaisuakan harinyo kaluargo padusi mamulangkan dulang-dulang tasabuik, prosesi iko disabuik bhaze duza tapi bukan dulang kosong malainkan ado isinyo pulo. Bisa pulo dulang-dulang tasabuik indak paralu dibaliakan dek kaluargo pihak padusi. Namun iko alun disabuik bhaze duza, tapi pola timba baliak tatap harus ado.

2. Ngamba

Satalah acaro Temba Zazasalasai, diadokan patamuan kaluargo dari pihak laki-laki jo padusi untuak bakonsultasi jo mamutuihkan babarapo hal tamasuak hari jo tangga acaro.

3. Nai ono jo Buku Pelulu

Sabalun acaro iko balangsuang, kaluargo gadang laki-laki alah diundang sacaro lisan sabalun dipanggia (sodho sambu) dek pawakilan kaluargo inti untuak mangikuiki jo manyukseskan acaro lamaran. Salanjuiknyo masiang-masiang kaluargo gadang laki-laki manyiapkan barang-barang hantaran nan ka dibawo. Satalah salasai manyampaikan makasuik jo tujuan tibo, pihak laki-laki pun mambuek syaraik jo manyarahkan sahalai kain tanun Ende kapado urang tuo padusi nan disabuik buku pelulu. Jiko kainnyo ditarimo, bararti lamarannyo ditarimo, baitupun sabaliaknyo, jiko padusi indak manarimo kain tanun, bararti lamarannyo ditulak.

4. Bhaze Duza (balik dulang).

Bhaze Duza artinyo, pihak padusi mambaliakan talam-talam nan dibawo dek pihak laki-laki pado saaik acaro Nai Ono, biasonyo babarapo hari atau saminggu satalah acaro Nai Ono. Jumlah talam nan dibaliakan harus samo jo nan dikirim dek pihak laki-laki tatapi isinyo mungkin babeda.

5. Wa’u ngao dan Wa’u sodho

Wa’u ngao dan Wa’u sodho marupokan tahapan dimano pihak kaluargo mambaritahukan kapado saluruah kaluargo gadang jo masyarakaik satampek bahso alah tajadi paminangan.

6. Wa’u aze

Satalah babarapo wakatu dari rangkaian acaro sabalunnyo, pihak kaluargo anak daro mangirimkan duo urang untuak tibo ka rumah pihak marapulai jo makasuik untuak mananyokan tangga panikahan, jiko pihak kaluargo marapulai masih mambutuahkan wakatu untuak mangumpuakan pitih guno biayo panikahan tasabuik, mako mereka akan maagiahan sinyal manggunokan tali. Jiko tali nan diagiahkan panjang atau istilah Ende nyo adolah Tazi Rewa, bararti laki-laki masih mambutuahkan wakatu labiah lamo. Sabaliaknyo, jiko tali nan diagiahkan adolah tali pendek atau disabuik juo Tazi Bhoko, bararti panikahan akan dilangsuangkan dalam wakatu dakek.Setalah calon marapulai siap untuak manikah, inyopun mananyokan kapado pihak padusi bilo wakatu (bulan jo tangga) nan tapek untuak malangsuangkan panikahan. Jiko padusi alah manamukan tangga jo wakatu, mereka akan mangirim sasaurang baliak ka rumah laki-laki untuak maagiahtau mereka bulan jo tangga panikahan.

7. Minu ae petu

Acaro iko disalenggarokan dek marapulai jo maundang kaluargo, karabaik sarto tatanggo-tatanggo kampuang, nan diundang akan mambawo sajumlah pitih nan dilatak di dalam amplop. Pitih iko akan digunokan subagai tambahan untuak kaparluan acaro panikahan.

8. Mendhi balanja,

Tradisi mendhi balanja dikanal jo banyak sinonim misalnyo antar balis atau tu’u balanja atau juo acok disabuik jo tradisi hantaran. Kauniakan mendhi balanja iko adolah hantaran nan diagiahkan dek laki-laki kapado padusi subagai pangganti ASI. Mendhi balanja iko harus dibayia dek pria kapado padusi nan akan manikah. Gadangnyo mendhi balanja iko ditantukan badasarkan kasapakaikan kaluargo kaduo calon mampelai. Tigo minggu sabalun akad nikah digala, pihak kaluargo padusi ka mangirimkan sasaurang untuak tibo ka rumah pihak laki-laki jo rincian jumlah mendhi balanja. Jiko manuruik kaluargo laki-laki jumlahnyo sangaik tinggi, mereka akan mangirim urang untuak tibo ka rumah padusi untuak barundiang. Kamudian jiko kaduo balah pihak alah sapakaik mako babarapo hari satalah itu pihak kaluargo pihak laki-laki harus maagiahan pitih jo barang-barang sasuai kasapakaikan. Gadangnyo mendhi balanja dipangaruahi dek faktor katurunan, pandidikan, sosial, ekonomi, karajo jo karancakan anak padusi mereka. Sahinggo samakin tinggi strata mereka, samakin banyak pulo jumlah mendhi balanja nan ka dibayiakan dek pihak laki-laki untuak panikahan mareka. Masyarakaik di Kabupaten Ende mawajibkan mendhi balanja supayo bisa manikahi anak padusinyo. Jiko indak dipanuahi mako pakawinan dianggok batal dek kaluargo.

9. Deba’ dan Pa’i Laka

Acara iko dilaksanokan malam hari sabalun akad nikah balangsuang. Mereka malantunkan doa-doa subagai ungkopan raso syukua jo juo subagai malam henna untuak padusi, mareka ka bagadang samalaman untuak manghias jari-jari pangantin padusi.

10. Tu ata nika/jeju

Tu ata nika/jeju adolah arak-arakan pihak laki-laki manuju rumah pihak padusi atau tampek diadokannyo akad nikah, biasonyo tadapek oto pick up nan diisi dek pamain rabana, suliang jo gandang jo ka dimainkan bunyi-bunyian khas salamo iriang-iriangan balangsuang.^[6]

Pakaian adaik khas urang Ende adolah Lawo Lambu. Lawo artinyo kain tanun nan biasonyo digunokan untuak padusi, sadangkan lambu artinyo baju tradisional. Lawo Lambu marupokan pakaian tradisional nan acok dipakai padusi dari Kabupaten Ende. Lawo barupo saruang tanun ikek nan tadiri dari banyak janis.

Samantaro itu, Lambu babantuak sarupo Baju Bodo dari urang Bugis. Modelnyo sangaik sadarhano, babantuak sagi ampek, jo ampek lubang untuak badan, kapalo, jo kaduo tangan.

Aksesoris nan biaso digunokan basamoan saaik mangenakan Lawo Lambu adolah tusuk konde, subang ameh, galang gadiang, galang ameh, hinggo kaluang ameh. Urang Ende nan taalkulturasi jo budayo jo agamo Islam umuamnyo bajilbab sahinggo rambuiknyo indak tacaliak (dikonde).^[7]

1. ↑ "Inilah Asal Usul Nama Kota Ende". Pos-kupang.com (dalam bahasa Indonesia). Diakses tanggal 2023-02-15. 
2. ↑ ^{a b} Melalatoa, M. Junus (1995). Enskilopedi Suku Bangsa di Indonesia Jilid A-K. Jakarta: Departemen Pendidikan dan Kebudayaan RI. https://p2k.stekom.ac.id/ensiklopedia/Suku_Ende#cite_note-1. 
3. ↑ Khalikin, Ahsanul. (2016). Tradisi di Tengah Keberagamaan Media Interaksi Masyarakat Ende dalam Membangun Relasi Antarumat Beragama Badan Litbang dan Diklat Kementerian Agama RI. Jurnal Multikultural & Multireligius Vol. 15. Diakses tanggal 15-02-2023
4. ↑ Lidi, Maria Waldetrudis; Daud, Maimunah H.; Bolong, Morison Yosep M. (2020-08-09). "POTENSI KEARIFAN LOKAL TAMBI UMA SUKU ENDE SEBAGAI SUMBER BELAJAR BIOLOGI DAN PENDIDIKAN KARAKTER". Jurnal Pendidikan Biologi (dalam bahasa Inggris). 12 (1): 45–51. doi:10.17977/um052v12i1p45-51. ISSN 2540-9271. 
5. ↑ Adon, Mathias Jebaru, dkk. (2022). Mengkritisi Tradisi Berbagi dalam Upacara Adat Nggu Lio-Ende Flores NTT dalam Terang Teologi Pembebasan Gereja Katolik. Abrahamic Religions: Jurnal Studi Agama-Agama (ARJ), 2(1), 76-89. E - ISSN: 2797-6440 P - ISSN : 2797-7722
6. ↑ A.s, Arini Anggriany; Sudirman, Sudirman (2022-06-24). "Tradisi Upacara Perkawinan Adat Masyarakat Suku Ende Perspektif 'Urf". Sakina: Journal of Family Studies (dalam bahasa Inggris). 6 (3). doi:10.18860/jfs.v6i3.1996. ISSN 2580-9865. Diarsipkan dari versi asli tanggal 2023-10-06. Diakses tanggal 2023-02-15. 
7. ↑ "Mengenal Ragam Pakaian Adat Flores". kumparan (dalam bahasa Indonesia). Diakses tanggal 2023-02-17. 

• Ritual dan Kepercayaan Masyarakat Ende Provinsi Nusa Tenggara Timur Pakian Adat Ende
• Pakian Adat Ende www.youtube.com