Urang Nimboran

Urang Nimboran atau Nambrung atau Nambrong nan tingga di lambah sungai Sermowai, Moaif dan Nimboran di Papua bagian Utara, dakek pabatehan Indonesia jo Papua Nugini. Kampuang-kampuangnyo adolah : Genyem, Ambrop, Warombai, Imeno, Sermai dan Berap. Jumlah populasinyo sakitar 4.000 jiwa. Namo Nimboran mungkin asalnyo dari sabuah namo anak sungai Nimbu.^[1]

Urang Nimboran mampunyoi bahasonyo surang iyolah bahaso Nimboran, nan digolongkan ka dalam bahaso Papua Utara. Peneliti bahaso manyatoan jumlah panutur bahaso iko taun 1978 bajumlah 3.500 jiwa. Bahaso iko basamo bahaso Sewan, bahaso Sentani di kalompokan ka dalam kalompok bahaso Sewan. Sasudah taun 1915 jo masuaknyo Zending, mareka mulai mangenal bahaso Malayu karano bahaso iko digunoan sabagai bahaso pengantar di sakolah ado pulo nan manggunoan bahaso Belando.^[2]

Mato pancaharian masyarakaiknyo adolah baladang nan tasabuik rajin. Ladangnyo dipaga bia ndak gaduah binatang bueh, tarutamo kondiak. Tanaman pokok mareka adolah ubi jala, singkong, kaladi, jaguang, sayua jo buah-buahan. Karajo di ladang umumnyo dilakuan dek anggota kaluarga batih. Pado maso dahulu ladang iko suko bapindah-pindah untuak mandapekan tanah subur baru, kini mareka alah mulai batani sacaro intensif. Salain itu mareka dapek mandapekan ikan nan cukuik banyak dari sungai-sungai nan mangalia ka wilayahnyo. Binatang paburuannyo adolah kondiak, kasuari, mancik dan buruang.^[1]

Masyarakaik Nimboran tingga di kampuang nan lataknyo umumnyo di lereng-lereng bukik. Kalompok kakarabatannyo nan paliang utamo adolah kaluarga batih, iyolah gabuangan dari babarapo kaluarga inti junior jo kaluarga inti senior asa mareka. Prinsip hubuangan karabaiknyo adolah patrilineal.^[1]

1. ↑ ^{a b c} Hidayah, Dr. Zulyani (2015). Ensiklopedi Suku Bangsa di Indonesia. Jakarta: Yayasan Pustaka Obor Indonesia. pp. 289. ISBN 978-979-461-929-2. 
2. ↑ Melalatoa, M. Junus (1995). Ensiklopedi Suku Bangsa di Indonesia Jilid L-Z. Jakarta: Direktorat Jenderal Kebudayaan. pp. 638. https://books.google.co.id/books?id=FbGECgAAQBAJ&pg=PA638&dq=suku+nimboran&hl=en&sa=X&redir_esc=y#v=onepage&q=suku%20nimboran&f=false.