Ametralladora

Ametralladora
clase funcional de armas (es)
Arma automática (es) y selective fire firearm (en)

L'ametralladora^[1] ye un arma de fueu automática diseñada pa disparar una gran cantidá de bales a partir d'un cargador o una cinta de municiones, que de normal nun ralu curtiu y de forma sostenida puede disparar cientos de bales per minutu, por cuenta del so mecanismu de disparu automáticu, ya impactando nun determináu campu de tiru. Les ametralladores xeneralmente son pesaes, avolumaes y tán montaes sobre un afuste. L'usu modernu d'esta pallabra refierse a les ametralladores automátiques, que fueron precedíes poles ametralladores manuales con dellos detalles automáticos.

La idea d'una arma de fueu que disparara de forma repetitiva funde los sos raigaños na primer xeneración d'armes de fueu maduru, a empiezos del sieglu XVI. Sicasí, va haber qu'esperar hasta la meyora de la metalurxa pa que surdieren los primeros modelos de fueu repetitivu coles Mitrailleuse franceses, armes de sofitu construyíes a partir de la superposición de cañones de calibre de fusil que se cargaben por retrocarga y que podíen disparase en socesión, semando de metralla (mitraille) l'arcu de fueu de l'arma. El so usu en combate na Guerra Franco-Prusiana nun dio resultaos concluyentes, sobremanera comparada coles pieces d'artillería de retrocarga prusianes, forxaes dafechu n'aceru y d'un efeutu netamente superior.

La primer arma automática eficaz foi l'ametralladora Gatling, con media docena o más de cañones de fusil dispuestos en posición circular alredor d'una exa y alimentaos por un cargador vertical o cilíndricu y aicionada per mediu d'un rabil. Magar de primeres caltenía la configuración de pieza d'artillería, asitiada nun armón como'l de los cañones de la dómina, el so perfeccionamientu va allixerando hasta dexar el tresporte por una sola bestia de carga. El so efeutu en conflictos coloniales foi un claru indicador de los cambeos que les socesives xeneraciones d'ametralladores diben producir nel campu de batalla. El frenu a la evolución de l'ametralladora pasó a ser la mentalidá de los oficiales de los exércitos occidentales, que la entendíen namái como una arma apropiada contra indíxenes, pero desaveniente nun campu de batalla européu.

En 1884 apaez la primer ametralladora auténtica, la Maxim inventada pol norteamericanu nacionalizáu británicu Hiram Maxim, qu'utilizaba la presión de salida de los gases de proyeición pa provocar el retrocesu del cañón, el montáu del zarru, la espulsión del casquillu y l'alimentación con otru nuevu cartuchu llográu d'una cinta nel llateral del arma.

Maxim realizó demostraciones per toa Europa y la so ametralladora foi adoptada pola mayoría de los exércitos del continente. En 1885, el fabricante Browning saca n'Estaos Xuníos d'América un modelu d'ametralladora remanáu pol gas que se recueye del cañón al traviés d'un émbolu dientro d'un tubu conectáu al cañón de l'arma, sistema adoptáu dempués pa los fusiles semiautomáticos y d'asaltu. Cuando'l Kaiser Guillermu II guardó diches demostraciones, dixo al respective de la creación de Maxim: "Esta ye l'arma, nun hai nada asemeyao".

En 1917 Browning saca'l so modelu más famosu, la M1917, que sigue siendo emplegáu anguaño y que funciona pol retrocesu del cañón. Les Browning fueron adoptaes pol exércitu d'Estaos Xuníos y darréu en munchos otros países de la OTAN, camudando los sos calibres col tiempu.

La so apaición camudó decisivamente'l sistema de combatir, que nun sufriera grandes evoluciones dende la dómina napoleónica, y al pie de l'artillería, obligó al usu de trincheres y convirtió la guerra en llinies estátiques dende les que se llanzaben asaltos masivos d'infantería contra les llinies enemigues, que de normal acababen en masacres inútiles.

Como respuesta a l'ametralladora apaecieron el carru de combate p'asaltar les llinies defendíes por ametralladores y les primeres soluciones que dexen a la infantería llevar armes automátiques pal asaltu, como'l subfusil o les primeres ametralladores llixeres.

Mientres la Primer Guerra Mundial, les ametralladores yeren armes pesaes, montaes sobre unes trébedes o ruedes al estilu d'un pequeñu cañón. P'aguantar les rabaseres continues ensin quedar inoperatives, los cañones diben montaos dientro de cilindros que yeren enllenaos con agua pa esfrecer l'arma.

Les ametralladores llixeres de la primer guerra y d'enteguerres son n'apariencia grandes fusiles diseñaos pa tiru automáticu como sofitu al pelotón de fusileros tradicional. Armes como la d'Estaos Xuníos BAR (Browning Automatic Rifle) emplegada nes dos guerres mundiales o la inglesa Bren, usada na Segunda Guerra Mundial, entren dientro d'esta categoría. De normal aliméntense per aciu de cargadores o tambores de 30 a 100 cartuchos y disponen d'un pequeñu bípode nel estremu pa disparar cómodamente baltáu. El conceutu permanez anguaño, y la mayoría de les ametralladores actuales d'esti tipu son fusiles d'asaltu modificaos pa dar una mayor duración al cañón, con un bípode y cargadores de más capacidá que los estándares del fusil del que proceden, anque hai modelos actuales de cinta diseñaos espresamente como ametralladores llixeres, como la FN Minimi belxicana (emplegada pol exércitu d'Estaos Xuníos y munchos países de la OTAN) y la CETME Ameli española.

Primero de la Segunda Guerra Mundial, los alemanes inventaron coles mesmes l'ametralladora polivalente o media. Esta arma puede actuar como una ametralladora de posición normal, al estilu de la Primer Guerra Mundial, montada nunes trébedes pesaes con mires p'actuar hasta 1.200 m; o puede ser desmontada, acoplada a un bípode y utilizada nel rol d'ametralladora llixera, pero con una potencia bien superior a les concebíes espresamente como tales.

Na Segunda Guerra Mundial, los alemanes emplegaron la MG 34 y la MG 42, que ye una versión simplificada de l'anterior, cola mayor parte de les sos pieces en chapa estampada p'abaratala. La MG 42 permanez hasta anguaño en serviciu na OTAN, nuna versión ameyorada denominada Rheinmetall MG3. Otros modelos son la M60 d'Estaos Xuníos de la dómina de Vietnam o la PKM rusa.

Na Segunda Guerra Mundial apaeció un tipu d'ametralladores de gran calibre, algame y capacidá de penetración: les ametralladores pesaes. Empléguense como antiaérees o pa destruyir vehículos con poco blindaxe o ensin él; son capaces de desmembrar a un soldáu, polo que tamién s'usen como ametralladores de posición y suelen ser escoyíes pa montales en carru de combate como arma auxiliar, blindaos d'asaltu o helicópteros. Con calibres ente'l 0.50 (12,7 mm) y 14,5 mm, munches tienen cuasi 3.000 m d'algame y pueden furar blindaxes llixeros.

Un tipu d'arma rellacionada coles ametralladores ye'l cañón automáticu, de 20 a 30 mm, montáu en torretes, blindaos d'asaltu o n'helicópteros y caces. N'ocasiones, ye remanáu per aciu d'una fonte d'enerxía esterna y dispón de múltiples cañones al estilu de los antiguos Gatling pa soportar la gastadura y calentamientu al que se ve sometida l'arma mientres el so usu. Esti tipu de cañón, qu'emplega proyeutiles con nucleu furador y velocidá de más de 1.000 m/s, consigue furar blindaxes de más entidá y estrozar vehículos con gran facilidá. Por exemplu, el cañón automáticu rotativu GAU-8 de 30 mm qu'emplega l'avión antitanque A-10 Thunderbolt ye capaz de furar el blindaxe cimeru de cualquier carru de combate o d'estropialu gravemente provocando mancaes a los ocupantes pola metralla.

Les ametralladores son armes que sufren una fuerte gastadura por cuenta de la gran cantidá d'impactos y fregadures de los sos mecanismos y a la erosión y calor que se xenera nel cañón. Los cañones nun suelen aguantar más d'unos centenares de disparos continuos ensin dilatase, de forma que puede llegase a inutilizar temporalmente l'arma, polo qu'hai que dosificar los disparos en forma de rabaseres con intervalos, y los rayaos del cañón foliar de tala forma qu'hai que sustituyir tol cañón cada 10.000 ó 15.000 disparos pa caltener les carauterístiques balístiques de l'arma.

Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables. Pues añadiles tu mesmu o avisar al autor principal del artículu na so páxina d'alderique pegando: {{subst:Avisu referencies|Ametralladora}} ~~~~

• Ametralladora llixera
• Ametralladora media
• Ametralladora pesada
• Subfusil
• Fusil d'asaltu
• Ametralladora Gatling
• Ametralladora Maxim
• Mitrailleuse

• Wikimedia Commons acueye conteníu multimedia sobre Ametralladora.
• Alrodiu de la cinta de l'ametralladora