Ursula Cantieni

D Ursula Cantieni (* 5. Dezämber 1947 z Züri; † 15. Augschte 2023 z Baade-Baade^[1]) isch e schwyzerisch-dytschi Schauspiileri gsii. Mer het si ab 1994 gchännt dur iri Roll ass Johanna Faller in dr Fäärnsehseerie Die Fallers – Die SWR Schwarzwaldserie.

D Cantieni isch e Doochter vum Schauspiiler un Diichter Erwin Cantieni un dr Sängeri Verena Landolt gsii. Si isch aafangs im Bündnerland ufgwagse un isch derno z Stuegert uf d Schuel gange, wu si s Abitur gmacht het. No dr Schuel het si Schauspiilunteriicht gnuu un vu 1967 bis 1970 Sprächerzieig un Schauspiil an dr Hoochschuel fir Musik un Daarstellendi Chunscht z Stuegert studiert. Si het as Reschyassischtänti gschafft un het vu 1970 bis 1974 Lehrufdreeg fir Sprächerzieig an dr Musikhoochschuel Stuegert, am Stadttheater Pforze un am Lehrerseminar Khuur ghaa. Vu 1974 bis 1978 het si ne Brofässuur fir Sprächuusbildig an dr Folkwangschuel z Essen ghaa.

Ab 1978 het d Cantieni as Schauspiileri gschafft. Vu 1978 bis 1982 isch si Mitgliid vum Ensemble vu dr Wiirttebäärgische Landesbihn z Esslenga gsii. Dert het si unter anderem s Suzanne in Der tolle Tag oder Figaros Hochzeit vum Beaumarchais (Reschy: Markwart Müller-Ellmau) gspiilt, d Marie in Woyzeck vum Georg Büchner (Reschy: Rolf Lansky), s Wyyb in Der Weibsteufel vum Karl Schönherr (Reschy: Mauro Guindani) un d Geesche in Bremer Freiheit vum Rainer Werner Fassbinder (Reschy: Dominik Neuner). Fir di letschtgnännt Roll het si 1980 dr eerscht Bryys bim 13. Internazionaale Theaterfeschtiwäl z Sitges (Spanie) fir di bescht Hauptroll iiberchuu.

Vu 1982 bis 1987 het si ne Engaschmänt am Stadttheater Konschtanz ghaa, wu si unter anderem d Toinette in Der eingebildete Kranke vum Molière (Reschy: Ulrich Khuon), s Titelrolle in s Lessings Minna von Barnhelm (Reschy: Müller-Ellmau) un d Sabine in dr Uruffierig vu Ein fliehendes Pferd vum Martin Walser (Reschy: Khuon) gspiilt het.

In dr Johr druf het si as freii Schauspiileri z Frankryych, in dr Bundesrepublik Dytschland, dr DDR, dr Niiderlande un dr Schwyz gschafft, unter anderem am Stadttheater Khuur, wu si unter anderem s Sonja Wilke in Himmel und Erde vum Reinshagen (Reschy: Guindani) un d Botin in Die Antigone des Sophokles vum Bertolt Brecht ( Reschy: Fritz Bennewitz) gspiilt het.

In däre Zyt het si au aigeni Theater- un Heerspiilprodukzioone un Reschyyaarbete gmacht, unter anderem Seh- und Hörspiele (Rote Fabrik, Züri, 1990), innen.Zeit (in ere eemoolige Schuefabrik bi Amriswil), Fugata in Tre (zäme mit dr Dominique Rebourgeon, Performance zur Scuntrada z Laax, 1991).

Vu 1991 bis 1994 het si bim Schwyzer Fäärnseh (SF DRS) dr Beraich Sprächtraining, Moderazioon un Aarbet vor dr Kamera glaitet.

Scho wu si no feschti Engaschmänt an Theater ghaa het, het si aagfange fir s Fäärnseh z schaffe. Si het fir verschiideni Sänder in Fäärnsehspielfilmen un Seerine mitgspiilt. Au in Musiksändige, Talkshow, Chochsändige un andere Fäärnsehsändige isch si ufdrätte.

Anne 1994 het si d Hauptroll vu dr Johanna Faller in dr neie Fäärnsehseerie Die Fallers – Eine Schwarzwaldfamillie iiberchuu, wu mer si zeescht z Baade-Wiirtebäärg un speeter in ganz Dytschland derduur chänne gleert het. Im Februar 2022 het si verchindet, ass si us perseenlige Grind no rund 27 Joor ufheert mit ire Mitaarbet an dr Seerie. Wäg dr scho abdrillte Folge het mer si no im ganze Joor chenne sää.^[2]

Vu 2003 bis 2022 isch d Cantieni e fescht Mitgliid im Team vu dr Rooteshow Sag die Wahrheit gsii.

Im Joor 2002 isch ire Chochbuech Ursula Cantienis Kochgeschichten uusechuu. Iber iri aige Websyte het si derzue au verschiideni kulinaarischi Spezialiteete verdriibe.

D Ursula Cantieni isch am 15. Augschte 2023 im Alter vu 75 Joor z Baade-Baade gstoorbe, wu si vyyl Joor lang gwoont ghaa het.

Anne 2005 isch d Ursula Cantieni mit dr Verdienschtmedallie vum Land Baade-Wiirtebäärg uuszaichnet woore.

• 1987: Der Polenweiher, (Fäärnsehfilm, SWF/ARD)
• 1989: Der letzte Gast, (Fäärnsehfilm, SDR)
• 1994–2023: Die Fallers – Die SWR Schwarzwaldserie (bis 2011: Die Fallers – Eine Schwarzwaldfamilie), (Fäärnsehseerie, SWR)
• 1996: Der Fischerkrieg am Bodensee, (Fäärnsehfilm, SDR/ARTE)
• 1997: Tatort – Nahkampf (Fäärnsehseerie), (ARD/SWR)
• 2003–2022: Sag die Wahrheit (Quizsendung)|Sag die Wahrheit, (Quizsändig, SWR)^[3]
• 2004: Utta Danella – Plötzlich ist es Liebe, (Fäärnsehfilm, ARD)
• 2005: Mama und der Millionär, (Fäärnsehfilm, ARD/SWR)
• 2006: Tatort – Gebrochene Herzen, (ARD/SWR)
• 2011: Tatort – Das schwarze Haus, (ARD/SWR)

• Nathanael Busch: Ursula Cantieni. In: Andreas Kotte (Hrsg.): Theaterlexikon der Schweiz. Band 1. Chronos, Zürich 2005, ISBN 3-0340-0715-9, S. 338 f.

 Commons: Ursula Cantieni – Sammlig vo Multimediadateie

• Websyte vu dr Ursula Cantienis
• Literatur vu un iber Ursula Cantieni im Katalog vu dr Dütsche Nazionalbibliothek
• Ursula Cantieni in dr Internet Movie Database

1. ↑ Mirka Tiede, Teo Jägersberg: Publikumsliebling aus "Die Fallers" Ursula Cantieni ist tot. In: SWR Aktuell. 15. August 2023, abgruefen am 15. August 2023. 
2. ↑ dpa: Ursula Cantieni steigt nach 27 Jahren bei den "Fallers" aus. Badische Zeitung, 9. Februar 2022, abgruefen am 10. Februar 2022. 
3. ↑ BT: Ursula Cantieni verlässt "Sag die Wahrheit". Badisches Tagblatt, abgruefen am 29. Juli 2022.