Ceratosaurus

iCeratosaurus Timäd fösilik: dona-Yurat
Dakipastad
Edadeadöl (fösil)
Dadiläd nolavik
Regnum: Animalia Phylum: Chordata Classis: Sauropsida Superordo: Dinosauria Ordo: Saurischia Subordo: Theropoda Infraordo: Ceratosauria Familia: Ceratosauridae Genus: Ceratosaurus Marsh, 1884
Bids
C. nasicornis (bid patedik) C. dentisulcatus C. ingens

Elaf Ceratosaurus (= lasär honilabik, tefü hon - in Vöna-Grikänapük κέρας, κέρατος - su snud onik) äbinon dinosaur yagöl gretik dona-Yurata. Fösils onik petuvons in Topäd di Morrison (Nolüda-Merop), in Tanzania (Frikop) e ba in Portugän. Pats kaladik ona äbinons maxüls gianagretik labü tuts lamafomik, hon gretik ä lamafomik su snud, e telat honilas love logs. Föfalims äbinons nämiks ab brefiks, e nams älabons doatis fol. Hipaboms päbalons (synsacrum); i leskelaboms päbalons ko ods e ko el synsacrum, sümiko ad böds nulädik. Luveratiko ädabinon i ked stigädilas, u ba sailil, ve bäk.

Elaf Ceratosaurus pasevon se Stanöp Dinosaurik di Cleveland Lloyd in zänod tata di Utah (Lamerikän), e se Stanöp di Dry Mesa in Colorado (Lamerikän). Bid patedik, fa hiel O. C. Marsh pebepenöl, binon Ceratosaurus nasicornis. Bids pluik tel pebepenons pos brefüp, ün 2000, C. magnicornis e C. dentisulcatus. Bofikafs labons koapis nämikum, e pubons in klifs bosilo nulikum, kas el C. nasicornis. Bids votik, a.s. C. ingens, C. stechowi, e bid, kel ya pemänioton as C. meriani, se Portugän, pebepenons stabü mater no lölöfik.

El Ceratosaurus älifon nilü dinosaurs äs elafs Allosaurus, Torvosaurus, Apatosaurus, Diplodocus e Stegosaurus. Ba ämätedon ko el Allosaurus as ravanim; ab, bi äbinon smalikum (älabon lunoti metas za 6-8, geiloti metas za 2,5, e vetoti milgramas za 500-1000), ba älabon pladi lönik oka in nimaleod timäda okik. El Ceratosaurus älabon koapi lunikum ä flekikumi, e göbi fomü ut krokoda; jenöfot at jiniko sinifon, das äkanon svimön gudikumo ka el Allosaurus stifikum. In lautot brefabüik oka, hiel Bakker ämobom, das el Ceratosaurus valemo äyagon nimis disvatik (a.s. fits, krokods), do jiniko äkanon yagön i dinosauris gretik. Ämobom i, das daülafs e yunafs lunomiko äfidons kobo. Klülabots gonü atos äbinon ye döbatabiks, e tutamals ela Ceratosaurus patuvons suvo su fösils dinosauras gretik taledik. Ma teorod popätik votik, el Ceratosaurus äyagon cifadilo elafis Dryosaurus, Camptosaurus ed Ornithopoda votik, ibä äbinon yagaf soelik e kluo no äfägon ad deidön elafis Saurodopa daülik. Dil nulüda onik bo äbinädon me funs e rets pälüvöl fa yagafs votik.

Röletafs ela Ceratosaurus äbinons elafs Genyodectes, Elaphosaurus, e Carnotaurus. Dadiläd ela Ceratosaurus e röletafas nilikün omik pedöbaton lefäkiko ün tims lätik. El Ceratosaurus binon balik sekü kalads okik: binon tu evolföl e tu sümik ad els Tetanurae, adas duton lü grup elafas Coelophysoidae; binon ye tu primöfik ön mods mödik, adas duton lü elafs Carnosauria. Röletafs nilikün onik jiniko äbinons elafs Abelisauria perioda Kretatik, ab el Ceratosaurus büon bü ons mö degbalionats yelas nen yüms sevädik ün prim Kretata.

Büo, el Ceratosaurus, els Abelisauria Kretatik, ed els Coelophysoidae primöfik pägrupons kobo ön nem: Ceratosauria, kel pämiedeton as „elafs Theropodae sümikum ad el Ceratosaurus ka ad böds“. Tüvots nutimik äjonons ye, das dists gretik ädabinons vü els Ceratosaurus lätikum gretik ä evolföls e foms büik soäs elaf Coelophysis. Do bevü els Theropodae tefädiko fagiks de böds, el Ceratosaurus e röletafs omik äbleibons labön patis bödik mödik (a.s. ritayoin onsik äbinon sümikum ad ut bödas ka ut ela Allosaurus). Soäsä veraton pro dinosaurs valik, plü fösils onsik potuvons, plü dadiläd e volfam onsik posuemons.

• El Ceratosaurus bal komipon ta el Triceratops in fomam yela 1966 biomagodema One Million Years B.C. (Yels balion b.K.).
• In biomagodem: Jurassic Park III, el Ceratosaurus bal pubon brefüpo.
• In biomagodem: When Dinosaurs Roamed America (Ven dinosaurs äzitevons Meropi), el Ceratosaurus bal pubon anikna, ab fino padeidon e pafidon fa el Allosaurus.
• In el manhwa Tsyosenänik, el Baby-Saurus Dooley famik binon el Ceratosaurus.
• In biomagodem: The Animal World (Nimavol, 1956), el Ceratosaurus bal deidon eli Stegosaurus dü komip, ab suno pos atos patatakon fa el Ceratosaurus votik, kel vilon tifön fidi onik. Els Ceratosaurus bofik fino falons deadio se klif geilik.
• El Ceratosaurus bal kompenon i pö The Land That Time Forgot (Län fa Tim Peglömöl, 1975), in kel komipon ta el Triceratops, e pö sökot: The People That Time Forgot (Mens fa Tim Peglömöls, 1977), in kel hiel Patrick Wayne savom lekevajipuli de els Ceratosaurus tel dubä dredükom onis me smokaboums.
• Els Ceratosaurus pubons in pled: Jurassic Park: Operation Genesis ela Vivendi Universal.

• Bakker, R. T., and G. Bir. 2004. Dinosaur crime scene investigations. In: P. J. Currie, E. B. Koppelhusw, M. A. Shugar, e J. L. Wright (red.): Feathered Dragons, pads: 301-342. Indiana University Press. ISBN 0-253-34373-9.
• Gilmore, C. W. 1920. Osteology of the carnivorous Dinosauria in the United States National Museum. United States National Museum Bulletin nüm: 110, pads: 1-154.
• Madison, J. H., and S. P. Welles. 2000. Ceratosaurus (Dinosauria, Therapoda), a revised osteology. Pübot nenomik. Utah Geological Survey. ISBN 1-55791-380-3.
• Marsh, O. C. 1896. Dinosaurs of North America. U. S. Geological Survey Annual Report nüm: 16, pads: 133-244.

• Bomem El Ceratosaurus in Mused Smithsonian Jenava Natik.
• Kaed, su kel tuvöps fösilas ela Ceratosaurus pajonons.
• Däsinot e nüns dö ela Ceratosaurus se bevüresodatopäd: Dinoplanet hiela Joe Tucciarone.
• Däsinot votik ela Ceratosaurus fa hiel Josef Moravec, se bevüresodatopäd: Dinosaur timeline.
• Däsinot votik ela Ceratosaurus fa hiel M. Shiraishi, se bevüresodatopäd: Jurassic Gallery
• Däsinot e nüns dö el Ceratosaurus nasicornis se bevüresodatopäd: dinosaur-world.
• Däsinots ela Ceratosaurus fa lekanans difik, se bevüresodatopäd: The Dinosauricon.

In Nedänapük:

• Nüns dö el Ceratosaurus se bevüresodatopäd: www.dinosaurus.net.

In Spanyänapük:

• Däsinot votik ela Ceratosaurus.