Téarmaí Seirbhíse Google

Éifeachtach ar: 30 Iúil 2026 | Leaganacha a cuireadh i gcartlann | Íoslódáil PDF

Leagan tíre: an Fhrainc

An méid a chlúdaítear sna téarmaí seo

Tá a fhios againn go bhfuil sé mealltach gabháil thar na Téarmaí Seirbhíse seo, ach tá sé tábhachtach an méid lenar féidir leat a bheith ag súil uainn agus úsáid á baint agat as seirbhísí Google agus an méid lena bhfuilimid ag súil uait a dheimhniú.

Léiríonn na Téarmaí Seirbhíse seo an chaoi a n-oibríonn gnólacht Google, na dlíthe atá i bhfeidhm ar ár gcuideachta agus rudaí áirithe ar mheasamar riamh a bheith fíor. Mar thoradh, cabhraíonn na Téarmaí Seirbhíse seo chun caidreamh Google leatsa a shainmhíniú de réir mar a idirghníomhaíonn tú lenár seirbhísí. Mar shampla, áirítear sna téarmaí seo na teidil topaice seo a leanas:

• An méid a bhféadfá a bheith ag súil leis uainne, a chuireann síos ar an gcaoi a soláthraímid agus a bhforbraímid ár seirbhísí
• Cad leis a mbímid ag súil uaitse, a leagann síos rialacha áirithe maidir lenár seirbhísí a úsáid
• Ábhar i seirbhísí Google, a chuireann síos ar na cearta maoine intleachtúla ar an ábhar a fhaigheann tú inár seirbhísí – cibé an mbaineann an t-ábhar sin leat, le Google nó le daoine eile
• I gcás fadhbanna nó easaontuithe, a chuireann síos ar chearta dlí eile atá agat agus cad ba cheart a bheith ag súil leis i gcás go sáraíonn duine na téarmaí seo

Tá sé tábhachtach go dtuigeann tú na téarmaí seo toisc go bhfuil ag tú aontú leo trí úsáid a bhaint as ár seirbhísí. Molaimid duit na téarmaí seo a íoslódáil le húsáid amach anseo. Cuirimid na téarmaí seo agus gach leagan a bhí ann roimhe seo ar fáil i gcónaí anseo.

Seachas na téarmaí seo, foilsímid Polasaí Príobháideachais chomh maith. Cé nach bhfuil sé mar chuid de na téarmaí seo, molaimid duit é a léamh chun tuiscint níos fearr a fháil ar an gcaoi ar féidir leat d'fhaisnéis a nuashonrú, a bhainistiú, a easpórtáil agus a scriosadh.

Téarmaí

Soláthraí seirbhíse

Sa Limistéar Eorpach Eacnamaíoch (LEE) agus san Eilvéis, soláthraítear seirbhísí Google ag an slánaonad seo a leanas a bhfuil conradh agat leis:

Google Ireland Limited
atá corpraithe agus ag oibriú faoi dhlíthe na hÉireann
(Uimhir Chláraithe: 368047 / Uimhir CBL: IE6388047V)

Teach Gordon, Sráid na Bearú
Baile Átha Cliath 4
Éire

Ceanglais aoise

Má tá tú faoin aois atá riachtanach chun do Chuntas Google féin a bhainistiú, ní mór cead do thuismitheora nó do chaomhnóra dhlíthiúil a bheith agat chun Cuntas Google a úsáid. Iarr ar do thuismitheoir nó ar do chaomhnóir dlíthiúil na téarmaí seo a léamh leat.

Más tuismitheoir nó caomhnóir dlíthiúil thú agus má thugann tú cead do do pháiste na seirbhísí a úsáid, baineann na téarmaí seo leat agus is tusa atá freagrach as gníomhaíocht do pháiste ar na seirbhísí seo.

Tá ceanglais bhreise aoise ag roinnt seirbhísí Google mar a mhínítear ina dtéarmaí agus polasaithe breise a bhaineann le seirbhís shonrach.

Do chaidreamh le Google

Cabhraíonn na téarmaí seo leis an gcaidreamh idir tú féin agus Google a shainiú. Nuair a labhraímid faoi "muid", "sinn" agus "ár", is é Google Ireland Limited agus a chleamhnaithe atá i gceist againn.

Ar an iomlán, tugaimid cead duit ár seirbhísí a úsáid agus rochtain a fháil orthu má aontaíonn tú na téarmaí seo a leanúint, a léiríonn an chaoi a n-oibríonn gnólacht Google. Déanaimid a lán dár dtáirgí, amhail Cuardach, Maps agus Gmail, inrochtana agus gan chostas do gach duine. Is í an fhógraíocht a fhágann gur féidir ár gcuid táirgí a thairiscint do gach duine. Déanaimid airgead trí spás fógraíochta a dhíol do ghnólachtaí agus úsáidimid do shonraí chun fógraí atá úsáideach duit a thaispeáint, de réir do shocruithe. Nuair a thaispeánaimid fógraí, tugaimid trédhearcacht agus rialuithe duit ionas gur féidir leat cinntí eolasacha a dhéanamh, m.sh. faoin bhfaisnéis fút a úsáidtear chun fógraí a thaispeáint. Úsáidimid d'fhaisnéis phearsanta freisin chun ár gcuid táirgí a dhéanamh níos cabhraí duit (mar shampla is é seo an chaoi ar féidir linn do chuardaigh a chomhlánú go huathoibríoch, thú a chur abhaile níos tapúla le Maps srl.). Chun tuilleadh faisnéise a fháil, féach ar Conas a oibríonn gnólacht Google.

An méid ar féidir leat a bheith ag súil leis uainn

Raon leathan seirbhísí úsáideacha á gcur ar fáil

Cuimsíonn go leor de na seirbhísí seo ábhar ar féidir leat a shruthú nó idirghníomhú leis.

Tá ár seirbhísí deartha le hoibriú le chéile, lena n-éascaítear duit bogadh ó ghníomhaíocht amháin go dtí an chéad cheann eile. Mar shampla, má chuirtear seoladh le himeacht Calendar atá agat, is féidir leat cliceáil ar an seoladh sin ionas go ndéanfaidh Maps eolas an bhealaigh duit.

Seirbhísí Google a fhorbairt, a fheabhsú agus a nuashonrú

Cé go dtugaimid sainmhíniú leathan ar "seirbhísí" sna téarmaí seo mar a dtugtar cur síos orthu thuas, déanann an dlí is infheidhme dealú idir "ábhar digiteach", "seirbhísí" agus "earraí" i gcásanna áirithe. Is é sin an chúis a n-úsáidimid na téarmaí níos sonraí sa rannán seo agus sa rannán i dtaca le Ráthaíocht dlí.

Bímid i gcónaí ag forbairt teicneolaíochtaí agus gnéithe nua chun ár seirbhísí a fheabhsú. Mar shampla, bainimid úsáid as intleacht shaorga agus meaisínfhoghlaim chun aistriúcháin chomhuaineacha a sholáthar duit agus chun turscar agus bogearraí mailíseacha a bhrath agus a bhacadh ar bhealach níos fearr.

Mar chuid d'fhorbairt leanúnach ár n-ábhair, ár seirbhísí agus ár n-earraí digiteacha, déanaimid mionathruithe amhail gnéithe agus feidhmiúlachtaí a chur leo nó a bhaint díobh, teorainneacha úsáide a ardú nó a laghdú, ábhar digiteach nó seirbhísí digiteacha nua a thairiscint nó scor de sheanchinn. D'fhéadfaimis freisin ár n-ábhar, ár seirbhísí nó ár n-earraí digiteacha a athrú ar na cúiseanna eile seo a leanas:

• chun dul i dtaithí ar theicneolaíochtaí nua
• chun arduithe nó laghduithe i líon na ndaoine a úsáideann seirbhís áirithe a léiriú
• chun freagairt do phríomhathruithe maidir leis na ceadúnais agus comhpháirtíochtaí atá againn le páirtithe eile
• chun mí-úsáid nó dochar a chosc
• chun aghaidh a thabhairt ar fhadhbanna dlí, rialála, sábháilteachta nó slándála

Ní mór dúinn nuashonruithe a bhfuil ceanglais dlí orthu a dhéanamh chomh maith. Is mionathruithe iad lena gcoinnítear ábhar, seirbhísí nó earraí digiteacha i gcomhréir leis an dlí, ar feadh na híostréimhse ama a luaitear sa rannán Ráthaíocht dlí ar a laghad. Déanaimid na nuashonruithe sin ar ár n-ábhar, ar ár seirbhísí agus ar ár n-earraí digiteacha ar mhaithe le cúiseanna sábháilteachta nó slándála agus chun a chinntiú go gcomhlíontar na caighdeáin cháilíochta a bhfuil tú ag súil leo, amhail iad siúd a ndéantar cur síos orthu sa rannán Ráthaíocht dlí. Is féidir linn nuashonruithe a shuiteáil go huathoibríoch lena dtugtar aghaidh ar rioscaí suntasacha sábháilteachta nó slándála. I gcás nuashonraithe eile, is féidir leat a roghnú an mian leat iad a shuiteáil.

Coinnímid clár mionchúiseach maidir le taighde faoi tháirge, mar sin de, sula n-athraímid seirbhís nó sula stopaimid de bheith á tairiscint, déanaimid machnamh cúramach ar do spéiseanna mar úsáideoir, ar d'ionchais réasúnta agus ar an tionchar a d'fhéadfadh a bheith ann ortsa agus ar dhaoine eile. Ní athraímid seirbhísí ná ní stopaimid de bheith á dtairiscint ach ar chúiseanna bailí.

Má chuireann mionathrú isteach go diúltach ar do chumas rochtain a fháil ar ár n-ábhar nó ar ár seirbhísí nó earraí digiteacha nó iad a úsáid, nó má stopaimid go hiomlán de sheirbhís a thairiscint, cuirfimid réamhfhógra réasúnta ar fáil duit trí ríomhphost – ina mbeidh cur síos ar na hathruithe, cathain a tharlóidh siad agus do cheart chun deireadh a chur le do chonradh linn má chruthaíonn ár mionathruithe níos mó ná tionchar diúltach beag – ach amháin i gcásanna práinneacha amhail mí-úsáid nó díobháil a chosc, ceanglais dlí a chomhlíonadh nó aghaidh a thabhairt ar fhadhbanna slándála agus inoibritheachta. Tabharfaimid deis duit chomh maith chun d'ábhar a easpórtáil ó do Chuntas Google le Google Takeout, faoi réir dlíthe agus polasaithe infheidhme.

An méid a bhfuilimid ag súil leis uait

Na téarmaí seo agus téarmaí breise a bhaineann go sonrach le seirbhís a leanúint

Is féidir leat féachaint ar na téarmaí seo agus iad a chóipeáil agus a stóráil i bhformáid PDF. Is féidir leat glacadh leis na téarmaí seo agus le haon téarmaí breise a bhaineann go sonrach le seirbhís nuair a bhíonn tú sínithe isteach i do Chuntas Google.

Cuirimid roinnt polasaithe, lárionaid chabhrach agus acmhainní eile ar fáil duit chomh maith chun ceisteanna coitianta a fhreagairt agus chun na rudaí a bhféadfá a bheith ag súil leo agus tú ag úsáid ár seirbhísí a shocrú. Áirítear leis na hacmhainní seo ár bPolasaí Príobháideachais, Lárionad Cabhrach Cóipchirt, Lárionad Sábháilteachta, Lárionad Trédhearcachtaagus leathanaigh eile ar féidir rochtain a fháil orthu ónár suíomh polasaithe. Ar deireadh, féadfaimid treoracha agus rabhaidh ar leith, amhail boscaí dialóige a thugann foláireamh duit maidir le faisnéis thábhachtach, a sholáthar laistigh dár seirbhísí.

Cé go dtugaimid cead duit ár seirbhísí a úsáid, coimeádaimid aon chearta maoine intleachtúla atá againn sna seirbhísí.

Bíodh meas agat ar dhaoine eile

Soláthraíonn ár dtéarmaí agus polasaithe breise a bhaineann go sonrach le seirbhís, amhail ár bPolasaí maidir le hÚsáid Choiscthe IS Ghiniúnaigh, sonraí breise maidir le hiompar cuí nach mór do gach duine a úsáideann na seirbhísí sin cloí leis. Má fhaigheann tú amach nach bhfuil daoine eile ag leanúint na rialacha sin, tugann go leor dár seirbhísí deis duit mí-úsáid a thuairisciú. Má ghníomhaímid ar thuairisc ar mhí-úsáid, cuirimid an próiseas a ndéantar cur síos air sa rannán Gníomh a dhéanamh i gcás fadhbanna ar fáil freisin.

Ná bain mí-úsáid as ár seirbhísí

Tuigeann formhór na ndaoine a fhaigheann rochtain ar ár seirbhísí nó a úsáideann iad na rialacha ginearálta a choinníonn an tIdirlíon sábháilte agus oscailte. Ar an drochuair, níl meas ag líon beag daoine ar na rialacha sin, mar sin táimid ag cur síos orthu anseo chun ár seirbhísí agus ár n-úsáideoirí a chosaint ar mhí-úsáid. Sa mheon sin:

• bogearraí mailíseacha a thabhairt isteach
• ár gcórais nó ár mbearta cosanta a spamáil, iad a haiceáil nó dul timpeall orthu
• éalú, leideanna sáraíochta nó inteilgean leideanna, seachas mar chuid dár ríomhchláir do shábháilteacht agus do thástáil fabhtanna
• ár seirbhísí nó ár n-ábhar a rochtain nó a úsáid ar bhealaí calaoiseacha nó mealltacha, amhail:
• fioscaireacht
• cuntais bhréige nó ábhar bréige a chruthú, lena n-áirítear léirmheasanna bréige
• daoine eile a mhíthreorú chun a chreidiúint gur duine daonna a chruthaigh ábhar IS ghiniúnaigh
• seirbhísí a sholáthar a bhfuil an chuma orthu gur uaitse (nó ó dhuine eile) a thagann siad ó bhun nuair is uainne a thagann siad
• seirbhísí a sholáthar a bhfuil an chuma orthu gur uainne a thagann siad ó bhun nuair nach dtagann
• ár seirbhísí a úsáid (lena n-áirítear an t-ábhar a sholáthraíonn siad) chun cearta dlí duine ar bith a shárú, amhail cearta maoine intleachtúla nó cearta príobháideachais
• ais-innealtóireacht a dhéanamh ar ár seirbhísí nó ar ár dteicneolaíocht bhunaidh, amhail ár samhlacha meaisínfhoghlama, chun rúin cheirde nó faisnéis dhílsithe eile a asbhaint, seachas mar a cheadaítear faoin dlí is infheidhme
• modhanna uathoibrithe a úsáid chun rochtain a fháil ar ábhar ó cheann ar bith dár seirbhísí, is é sin gníomh a sháraíonn na treoracha meaisín-inléite ar ár suíomhanna gréasáin (mar shampla, comhaid robots.txt a dhícheadaíonn ransú, traenáil nó gníomhaíochtaí eile)
• ábhar ónár seirbhísí, arna ghiniúint ag IS, a úsáid chun samhlacha meaisínfhoghlama nó teicneolaíocht AI ghaolmhar a fhorbairt
• thú féin a fholú nó a mhíléiriú chun na téarmaí seo a shárú
• seirbhísí a sholáthar a mholann do dhaoine eile na téarmaí seo a shárú

Cead chun d'ábhar a úsáid

Deartar cuid dár seirbhísí chun ligean duit d'ábhara uaslódáil, a chur isteach, a stóráil, a sheoladh, a fháil nó a chomhroinnt. Níl aon oibleagáid ort aon ábhar a chur ar fáil dár seirbhísí agus tá lánchead agat an t-ábhar ba mhaith leat a chur ar fáil a roghnú. Má roghnaíonn tú ábhar a uaslódáil nó a chomhroinnt, cinntigh go bhfuil na cearta cuí agat le hamhlaidh a dhéanamh agus go bhfuil an t-ábhar dleathach.

Úsáid a bhaint as seirbhísí Google

Do Chuntas Google

Má chomhlíonann tú na ceanglais aoise seo is féidir leat Cuntas Google a chruthú ar mhaithe le d'éascaíocht. Éilíonn roinnt seirbhísí go bhfuil Cuntas Google agat chun go mbeidh siad in ann feidhmiú – mar shampla, chun Gmail a úsáid, tá Cuntas Google ag teastáil uait ionas go bhfuil áit agat chun ríomhphost a sheoladh agus a fháil.

Tá tú freagrach as a ndéanann tú le do Chuntas Google, lena n-áirítear céimeanna réasúnta a ghlacadh chun do Chuntas Google a choinneáil slán, agus molaimid duit an tSeiceáil Slándála a úsáid go rialta.

Seirbhísí Google a úsáid thar ceann eagraíochta nó gnólachta

Cumarsáid a bhaineann le seirbhísí

Chun ár seirbhísí a sholáthar duit, seolaimid fógraí seirbhíse agus faisnéis eile chugat uaireanta. Chun tuilleadh faisnéise a fháil faoin gcaoi a ndéanaimid cumarsáid leat, féach Polasaí Príobháideachais Google.

Má roghnaíonn tú aiseolas a thabhairt dúinn, ar nós moltaí chun ár seirbhísí a fheabhsú, féadfaimid gníomhú ar d'aiseolas gan a bheith faoi oibleagáid agat.

Costais Ceangail Líonra Mhóibíligh, Wi-Fi agus eile

D'fhéadfadh sé go n-úsáidfí an t-Idirlíon le seirbhísí Google go minic nuair nach bhfuil tú ag idirghníomhú go díreach leis na seirbhísí ná le do ghléas. Úsáideann Google an t-Idirlíon ar an mbealach sin chun críocha éagsúla – mar shampla, chun nuashonruithe bogearraí a sholáthar agus chun seirbhísí, slándáil, eispéireas úsáideora agus/nó oibríochtaí Google a fheabhsú, lena n-áirítear an fhógraíocht. Braitheann na húsáidí sin ar do cheangail líonra mhóibíligh, Wi-Fi agus/nó ceangail líonra eile agus d'fhéadfadh sé go mbeadh siad san áireamh i do liúntas sonraí a chuireann do sholáthraithe seirbhíse móibílí nó Idirlín ar fáil duit. Is tusa atá freagrach as na húsáidí líonra agus as na costais ghaolmhara sin ar fad. B'fhéidir gur mian leat do phlean seirbhíse móibílí nó Idirlín agus socruithe do ghléis agus do líonra a sheiceáil.

Ábhar i seirbhísí Google

D'ábhar

Ceadaíonn roinnt dár seirbhísí duit ábhar bunaidh a ghiniúint. Ní éileoidh Google úinéireacht ar an ábhar sin.

Tugann cuid dár seirbhísí an deis duit d'ábhar a chur ar fáil go poiblí – mar shampla, d'fhéadfá léirmheas táirge nó bialainne a scríobh tú a phostáil nó blagphostáil a chruthaigh tú a uaslódáil.

• Féach ar an rannán Cead chun d'ábhar a úsáid le haghaidh tuilleadh faisnéise faoi do chearta i d'ábhar agus faoin gcaoi a n-úsáidtear d'ábhar inár seirbhísí
• Féach ar an roinn D'ábhar a bhaint chun a fháil amach cén fáth agus conas a d'fhéadfaimis ábhar arna ghiniúint ag úsáideoirí a bhaint dár seirbhísí

Má cheapann tú go bhfuil duine éigin ag sárú do chearta maoine intleachtúla, is féidir leat fógra faoin sárú a sheoladh chugainn agus déanfaimid gníomh cuí. Mar shampla, cuirimid Cuntais Google ar le daoine iad a sháraíonn cóipcheart arís is arís eile ar fionraí, nó déantar na cuntais sin a dhúnadh mar a ndéantar cur síos air inár Lárionad Cabhrach Cóipchirt.

Ábhar Google

I gcuid dár seirbhísí tá ábhar a bhaineann le Google – mar shampla, go leor de na léaráidí amhairc a fheiceann tú in Google Maps. Is féidir leat ábhar Google a úsáid mar a cheadaítear leis na téarmaí seo agus aon téarmaí breise a bhaineann go sonrach le seirbhís, ach coinnímid aon chearta maoine intleachtúla atá againn inár n-ábhar. Ná bain, ná ceil agus ná hathraigh aon bhrandáil, lógó nó fógra dlí dár gcuid. Más mian leat ár mbrandáil nó lógónna a úsáid, féach ar leathanach Ceadanna Branda Google.

Ábhar eile

Ar deireadh, tugann cuid dár seirbhísí rochtain duit ar ábhar a bhaineann le daoine eile nó le heagraíochtaí eile, mar shampla, cur síos úinéir siopa ar a g(h)nólacht féin nó alt nuachtáin a thaispeántar in Google News. Ní féidir leat an t-ábhar sin a úsáid gan cead an duine nó na heagraíochta sin, nó mar a cheadaítear a mhalairt le dlí. Maidir leis na tuairimí a chuirtear in iúl in ábhar ó dhaoine eile nó ó eagraíochtaí eile, is leosan iad agus ní gá go léireoidís tuairimí Google.

Bogearraí i seirbhísí Google

Áirítear le cuid dár seirbhísí bogearraí in-íoslódáilte nó réamhlódáilte. Tugaimid cead duit na bogearraí sin a úsáid mar chuid de na seirbhísí.

I gcuid dár seirbhísí tá bogearraí a thairgtear faoi théarmaí ceadúnais foinse oscailte a chuirimid ar fáil duit. Uaireanta tá forálacha sa cheadúnas foinse oscailte a sháraíonn codanna de na téarmaí seo go sainráite, mar sin bí cinnte go léann tú na ceadúnais sin.

Ní féidir leat aon chuid dár seirbhísí nó dár mbogearraí a chóipeáil, a mhodhnú, a dháileadh, a dhíol ná a léasú.

I gcás fadhbanna nó easaontuithe

Tugann an dlí agus na dtéarmaí seo araon an ceart (1) chun caighdeán áirithe seirbhíse agus (2) chun bealaí le fadhbanna a réiteach má théann cúrsaí chun donais. Más tomhaltóir, thú, tá na cearta dleathacha uile agat atá ag tomhaltóirí de réir an dlí is infheidhme, chomh maith le haon chearta eile a sholáthraítear de réir na dtéarmaí seo nó de réir téarmaí breise a bhaineann go sonrach le seirbhís.

Ráthaíocht dlí

Ráthaíochtaí dlí is infheidhme maidir le hearraí

Mar thomhaltóir, baineann tú tairbhe as ráthaíocht dlí chomhréireachta ar d'earraí, chomh maith le ráthaíocht dlí maidir le lochtanna folaithe na n-earraí, faoi na coinníollacha a shainmhínítear thíos.

Ráthaíochtaí dlíthiúla is infheidhme maidir le hábhar digiteach agus le seirbhísí digiteacha

Mar thomhaltóir, baineann tú tairbhe as ráthaíocht dlí chomhréireachta agus ráthaíocht dlí maidir le lochtanna folaithe ar d'ábhar digiteach nó ar do sheirbhís dhigiteach.

Níl do chearta faoi na ráthaíochtaí dlí seo teoranta ag aon ráthaíochtaí tráchtála eile a d'fhéadfaimis a sholáthar le haghaidh ábhar, seirbhísí nó earraí digiteacha sonracha (amhail Baránta Teoranta Crua-earraí Tomhaltóirí Google nach bhfuil infheidhme maidir le ceannach sa Fhrainc). Má tá tú ag iarraidh éileamh faoi ráthaíocht a dhéanamh, déan teagmháil linn.

Dliteanais

Do gach úsáideoir

Seachas na dliteanais a mhínítear thuas, níl Google faoi dhliteanas ach as sáruithe na dtéarmaí seo nó na dtéarmaí breise a bhaineann le seirbhís, faoi réir an dlí is infheidhme.

D'úsáideoirí gnó agus d'eagraíochtaí gnó amháin

Más úsáideoir gnó nó eagraíocht thú:

• Sa mhéid go gceadaítear faoin dlí is infheidhme é, slánóidh tú Google agus a stiúrthóirí, a oifigigh, a fhostaithe agus a chonraitheoirí ar aon imeachtaí dlí tríú páirtí (lena n-áirítear gníomhartha ag údaráis rialtais) a éiríonn as na nithe seo a leanas nó atá bainteach leo: úsáid neamhdhleathach a bhaineann tú as na seirbhísí nó sárú a dhéanann tú ar na téarmaí seo nó ar théarmaí breise a bhaineann go sonrach le seirbhís. Clúdaíonn slánaíocht den chineál sin aon dliteanas nó aon chostas a éiríonn as éilimh, cailliúintí, damáistí, breithiúnais, fíneálacha, costais dlíthíochta agus táillí dlí, ach amháin sa mhéid gur sárú, faillí nó mí-iompar toilteanach Google is cúis le dliteanas nó caiteachas.
• Má tá tú díolmhaithe go dleathach ó fhreagrachtaí áirithe, lena n-áirítear slánú, ní bhaineann na freagrachtaí sin leat faoi na téarmaí seo. Mar shampla, tá díolúintí áirithe ag na Náisiúin Aontaithe ó oibleagáidí dleathacha agus ní sháraíonn na téarmaí seo na díolúintí sin.
• Seachas mar a luaitear sa rannán Do gach úsáideoir thuas, ní bheidh Google freagrach as na dliteanais seo a leanas:
  • cailliúint gan choinne brabús, ioncaim, deiseanna gnó, dea-thola nó coigiltis réamh-mheasta
  • caillteanas indíreach nó iarmhartach
• Ach amháin mar a luaitear sa rannán Do gach úsáideoir thuas, tá dliteanas iomlán Google, a éiríonn as nó a bhaineann leis na téarmaí sin, teoranta do cibé acu seo is mó (1) €500 nó (2) 125% de na táillí a d'íoc tú chun na seirbhísí ábhartha a úsáid sa 12 mhí roimh an sárú.

Gníomh a dhéanamh i gcás fadhbanna

Sula ndéanfaimid gníomh mar a dtugtar cur síos air thíos, tabharfaimid réamhfhógra duit nuair is féidir go réasúnta, déanfaimid cur síos ar an gcúis lenár ngníomh, agus tabharfaimid an deis duit an fhadhb a shoiléiriú agus í a réiteach, ach amháin má tá cúiseanna oibiachtúla agus nithiúla ann chun a chreidiúint go mbeadh na nithe seo a leanas mar thoradh ar amhlaidh a dhéanamh:

• dochar nó dliteanas a dhéanamh d'úsáideoir, do thríú páirtí nó do Google
• an dlí nó ordú údaráis forfheidhmithe dlí a shárú
• cur as d'fhiosrúchán
• oibriú, sláine nó slándáil ár seirbhísí a chur i mbaol

D'ábhar a bhaint

Má tá cúiseanna oibiachtúla agus nithiúla ann lena chreidiúint go ndéantar le haon ábhar de do chuid (1) na téarmaí seo, téarmaí breise a bhaineann go sonrach le seirbhís nó polasaithe a shárú, (2) dlí infheidhme a bhriseadh nó (3) má tá cúiseanna oibiachtúla agus nithiúla ann lena chreidiúint gurbh fhéidir go ndéanfaí dochar leis dár n-úsáideoirí, do thríú páirtithe nó do Google, forchoimeádaimid an ceart an t-ábhar sin a bhaint anuas i bpáirt nó ina iomláine i gcomhréir leis an dlí is infheidhme. I measc na samplaí tá pornagrafaíocht leanaí, ábhar a éascaíonn gáinneáil nó ciapadh ar dhaoine, ábhar sceimhlitheoireachta agus ábhar a sháraíonn cearta maoine intleachtúla duine eile.

Do rochtain ar sheirbhísí Google a chur ar fionraí nó a fhoirceannadh

Gan teorainn a chur le haon cheann dár gcearta eile, féadfaidh Google do rochtain ar na seirbhísí a chur ar fionraí nó a fhoirceannadh nó do Chuntas Google a scriosadh má tharlaíonn aon cheann de na rudaí seo:

• sáraíonn tú na téarmaí seo, téarmaí breise a bhaineann go sonrach le seirbhís nó polasaithe go hábhartha nó arís agus arís eile
• ceanglaítear orainn é sin a dhéanamh chun ceanglas dlí nó ordú cúirte a chomhlíonadh
• má tá cúiseanna oibiachtúla agus nithiúla lena chreidiúint go mbíonn dochar nó dliteanas d'úsáideoir, do thríú páirtí nó do Google mar thoradh ar d'iompar, mar shampla trí haiceáil, fioscaireacht, ciapadh, daoine a chur amú nó ábhar nach leatsa é a chamchóipeáil

Chun tuilleadh faisnéise a fháil faoi na fáthanna a ndéanaimid cuntais a dhíchumasú agus cad a tharlaíonn nuair a dhéanaimid é sin, féach ar an leathanach seo den Lárionad Cabhrach. Má chreideann tú gur cuireadh do Chuntas Google ar fionraí nó gur cuireadh deireadh leis de bhotún, is féidir leat achomharc a dhéanamh.

Ar ndóigh, tá tú in ann stop a chur lenár seirbhísí a úsáid am ar bith. Más tomhaltóir atá bunaithe sa LEE thú, is féidir leat tarraingt siar ó na téarmaí seo laistigh de 14 lá tar éis duit glacadh leo. Má chuireann tú deireadh le húsáid seirbhíse, bheimis buíoch as fios a bheith againn cén fáth ionas gur féidir linn leanúint ar aghaidh ag feabhsú ár seirbhísí.

Díospóidí a réiteach, an dlí rialaithe agus cúirteanna

Le haghaidh faisnéise maidir leis an gcaoi le teagmháil a dhéanamh le Google, tabhair cuairt ar ár leathanach teagmhála.

Más cónaitheoir nó eagraíocht atá lonnaithe sa Limistéar Eorpach Eacnamaíoch (LEE) thú, tá na téarmaí seo, mar aon le do chaidreamh le Google faoi na téarmaí seo agus faoi théarmaí breise a bhaineann go sonrach le seirbhís, faoi rialú ag dlíthe do thíre cónaithe agus is féidir leat díospóidí dlíthiúla a thabhairt faoi bhráid do chúirteanna áitiúla. Más tomhaltóir atá lonnaithe sa LEE thú, déan teagmháil linn chun fadhbanna a réiteach go díreach.

Maidir leis na téarmaí seo

De réir an dlí, tá cearta áirithe agat nach féidir a bheith teoranta ag conradh amhail na téarmaí seirbhíse seo. Níl sé i gceist go ndéanfaidh na téarmaí seo na cearta sin a shrianadh ar aon bhealach.

Ba mhaith linn na téarmaí seo a dhéanamh éasca le tuiscint, mar sin d'úsáideamar samplaí ónár seirbhísí. Ach b'fhéidir nach mbeadh gach seirbhís a luaitear ar fáil i do thír féin.

D'fhéadfaimis na téarmaí seo agus na téarmaí breise a bhaineann go sonrach le seirbhís a nuashonrú (1) chun athruithe maidir lenár seirbhísí nó leis an gcaoi a ndéanaimid gnó a léiriú – mar shampla, nuair a chuirimid seirbhísí, teicneolaíochtaí, praghsáil nó sochair nua leis (nó nuair a bhainimid seanchinn), (2) ar chúiseanna dleathacha, rialála nó slándála, nó (3) chun mí-úsáid nó dochair a chosc.

Má nuashonraímid na téarmaí seo nó na téarmaí breise a bhaineann le seirbhísí sonracha, tabharfaimid réamhfhógra 30 lá ar a laghad duit (trí ríomhphost a sheoladh nó modhanna cuí eile a úsáid) agus tabharfaimid an deis duit chun na hathruithe a athbhreithniú, seachas má cheanglaítear orainn de réir dlí na hathruithe a chur i bhfeidhm láithreach, gan fanacht le deireadh na tréimhse fógra. Mura nglacann tú leis na téarmaí nua, ba cheart duit d'ábhar a bhaint agus stop a chur leis na seirbhísí a úsáid. Is féidir leat deireadh a chur le do chaidreamh linn am ar bith chomh maith, gan pionós, trí do Chuntas Google a dhúnadh.