Aucèu de mar

Lo tèrme aucèu de mar (o aucèu marin) remanda a un ensems que sei limits si definisson pron mau : en realitat, la definicion dau grope resulta mai d'una sòrta de consensus, per pas dire de tradicion, sus leis espècias qui s'i dèvon inclure e aquelei que s'i dèvon exclure, que sus de règlas taxonomicas, biologicas o ecologicas estrictas. Abitualament si classan dins aqueu grope aperaquí 305 espècias qu'apartènon a vuech familhas, qu'entretènon emé l'environa marina de relacions de dependéncia mai o mens estrictas pendent una partida importanta de son cicle naturau.

En delà de la varietat extraordinària dei talhas, deis estructuras o dei mòdes d'alimentacion, leis aucèus marins partejan un certan nombre de caracteristicas comunas impausadas per la vida dins leis environas aqüaticas saladas, de còups emé de condicions climaticas rudas, sovent sensa que li sieche possible de s'i sostraire : estructura parliculària dau plumatge, aptituda per lo desplaçament sus e dins l'aiga, longevitat, comportaments reproductius, etc. En particulari quai toi an tendéncia a niar en colonias densas sus lo litorau.

Considèran certans d'aqueleis aucèus coma de bois indicators de la qualitat de l'environament, e lei seguisson coma aquò.