[go: up one dir, main page]
Lompat ke isi

Kota bawah tanah Derinkuyu

Wikipedia Minangkabau - Lubuak aka tapian ilimu
Sabuah lorong di kota bawah tanah Derinkuyu

Kota bawah tanah Derinkuyu (bahaso Turki: Derinkuyu Yeraltı Şehri, arati: "sumua dalam")[1] adolah suatu kota bawah tanah kuno nan batingkek-tingkek, tapeknyo di Subprovinsi Derinkuyu, Provinsi Nevşehir, Turki. Bakadalaman inggo 54 m (177 kaki) di bawah pamukoan tanah,[2] kota tu dapek manampuang inggo sakita 20.000 urang basarato ewan taranak dan bahan makanan mareka.[3] Iko adolah kota bawah tanah tagadang nan lah digali, salain dari babarapo kompleks bawah tanah lainnyo nan taseba di babagai wilayah Kapadokia di Turki.[2]

Situs kota bawah tanah Derinkuyu mulai tabukak untuak umum pado taun 1969, dan 10%-15% dari kasaluruahan situs kini ko dapek diakses dek para wisatawan.[2] Derinkuyu bajarak 29 km sabalah selatan kota Nevşehir malalui jalan rayo Niğde.[1]

Ciri khas

[suntiang | suntiang sumber]
'Sakola' di kota bawah tanah Derinkuyu

Laweh kota bawah tanah Derinkuyu nan lah diekskavasi adolah salaweh 4 km2 atau 1,5 mil2.[3] Kompleks kota bawah tanah ko taatua dangan rancak dan punyo macam-macam fungsi publik tatantu, sarupo galeri, ruang tingga, kakuih, ruang patamuan, dapua umum, kapel, pinjaro, gudang sinjato, lorong akses, sumua, sarato corong udaro kusuih nan baguno bilo komunitas maadoan panggalian untuak wakatu nan lamo.[1][2] Dipakiroan tadapek ruang sakola pulo, nan bantuaknyo barupo ungguakan tanah mamanjang nan dikaliliangi parik-parik; sadang kandang taranak lataknyo salalu barado pado tingkek-tingkek tarateh dari kompleks tu.[2]

Tadapek salapan tingkek nan dibukak untuak umum, jo 204 jumalah anak janjang nan dapek dituruni dari tingkek tarateh inggo tadalam pado kompleks tu.[2] Ado 18-20 tingkek nan labiah dalam lai nan indak dibukak untuak umum.[3] Sungguahpun baitu, dipakiroan masih banyak lai bagian tasambunyi kota tu nan alun dieksplorasi.[2]

Sijarah

[suntiang | suntiang sumber]

Tadapek kontroversi manganai sia nan patamo kali mambangun kompleks tasabuik. Babarapo ahli Turki bapendapek baso bangso Hittit nan mambangun tingkek patamo sabagai gudang; karano cap-cap bangso Hittit ditamuan panduduak satampek kutiko mambangun pondasi rumah mareka, dan adonyo kota Hittit kuno Göllü Dǎgi nan bajarak 20 km sabalah barik daya Derinkuyu.[1][3] Manuruik panalitian Departemen Kabudayaan Turki, guo-guo patamo kamungkinan mulai dipadalam pado batuan vulkanik lunak di wilayah Kapadokia dek bangso Frigia (Phrygia), iyolah bagian dari bangso Indo-Eropa kuno, pado abaik ka-7 inggo ka-8 SM.[4] Kutiko pamakaian bahaso Frigia punah di zaman Romawi Kuno dan digantian dek karabik dakeknyo[5] iyolah bahaso Yunani,[6] para panduduak nan kudian alah baagamo Kristen lalu manambahan guo-guo bawah tanah mareka jo bangunan kapel dan batu basurek bauruf Yunani.

Kota di Derinkuyu tabentuak sapanuahnyo pado maso Bizantium, nan wakatu tu acok digunoan sabagai palinduangan taadok Muslim Arab salamo paparangan Bizantium-Arab (780-1180).[7][8] Derinkuyu taubuang jo kota-kota bawah tanah lainnyo malalui lorong bawah tanah nan panjangnyo bamil-mil. Babarapo artefak nan ditamuan di pamukiman bawah tanah tasabuik barasa dari Periode Bizantium Tangah, iyolah pado abaik ka-5 inggo ka-10. Kota-kota ko tatap dipakai dek panduduak asali Kristen sabagai tampek palinduangan taadok sarangan suku-suku Mongol di bawah pimpinan Timur Lenk pado abaik ka-14.[9][10]

Satalah wilayah ko jatuah di bawah kakuasoan Utsmaniyah, kota-kota digunoan sabagai lubang palinduangan (Yunani, katakomba) taadok panguaso Muslim Turki.[11] Ingga akia abik ka-20, panduduak Kapadokia Yunani dari wakatu ka wakatu masih manggunoan kota bawah tanah tu untuak malarian diri dari panindasan pihak Utsmaniyah.[11] R.M. Dawkins, surang ahli bahaso dari Cambridge nan manaliti panduduak Yunani Kapadokia antaro 1909-1911, mancatat pado taun 1909: "kutiko datang barito tabaru tantang pambantaian di Adana, sabagian gadang panduduak Axo balinduang di ruang-ruang bawah tanah ko, dan salamo babarapo malam indak barani tidua di ateh pamukoan tanah". Kutiko panduduak Kristen di wilayah tu tausia pado taun 1923 dalam paristiwa patukaran panduduak antaro Yunani jo Turki, kompleks bawah tanah tu lalu indak diunyi lai.[8][12]

Kompleks tasabuik ditamuan lai pado taun 1963, satalah warga satampek manamuan sabuah ruangan misterius di baliak dindiang di rumahnyo. Panggalian salanjuiknyo lah mambukak panamuan taadok jaringan lorong di kota bawah tanah tasabuik.[13]

Kota bawah tanah lainnyo

[suntiang | suntiang sumber]

Salain Derinkuyu, kota-kota bawah tanah lainnyo nan tabukak juo untuak umum adolah Kaymaklı, Özkonak, Özlüce, dan Gaziemir.[1] Di babagai wilayah Provinsi Nevşehir, Turki, dipakiroan tadapek sakita 30 kota-kota bawah tanah.[3]

Galeri

[suntiang | suntiang sumber]
  • Peta lokasi Derinkuyu, sarata kota-kota lainnyo di wilayah Kapadokia
    Peta lokasi Derinkuyu, sarata kota-kota lainnyo di wilayah Kapadokia
  • Kota bawah tanah Derinkuyu dinyatoan sabagai Situs Warisan Dunia UNESCO (1985)
    Kota bawah tanah Derinkuyu dinyatoan sabagai Situs Warisan Dunia UNESCO (1985)
  • Denah guo dan lorong di kota bawah tanah Derinkuyu
    Denah guo dan lorong di kota bawah tanah Derinkuyu
  • Pintu batu. Tinggi 1–1,5 m, teba 30–50 cm, dan barek 200–500 kg. Lubang di tangah dapek digunoan untuak mambukak dan manutup, atau maliek tamu nan di lua.[14]
    Pintu batu. Tinggi 1–1,5 m, teba 30–50 cm, dan barek 200–500 kg. Lubang di tangah dapek digunoan untuak mambukak dan manutup, atau maliek tamu nan di lua.[14]
  • Para pangunjuang dan tando larangan marokok
    Para pangunjuang dan tando larangan marokok
  • Ruang panyimpanan anggur di kota bawah tanah Derinkuyu
    Ruang panyimpanan anggur di kota bawah tanah Derinkuyu
  • Corong udaro di kota bawah tanah Derinkuyu
    Corong udaro di kota bawah tanah Derinkuyu
  • Kolam baptisan
    Kolam baptisan

Rujuakan

[suntiang | suntiang sumber]
  1. ↑ a b c d e Drake (2014). Eastern Turkey. Bradt Travel Guides. p. 164-166. ISBN 978184162490, 184162490X. https://books.google.co.id/books?id=dLaHAwAAQBAJ&pg=PA164&dq=derinkuyu&hl=id&sa=X&ei=nJdJVa-gIcyUuATApoGQDg&ved=0CDgQuwUwBA#v=onepage&q=derinkuyu&f=false. 
  2. ↑ a b c d e f g Lynn A. Levine (2012). Frommer's Turkey (edisi ke-7). John Wiley & Sons. p. 378. ISBN 978-1-118-33364-8, 1118333640. https://books.google.co.id/books?id=K_xWPbKsQFMC&pg=PA378&dq=derinkuyu&hl=id&sa=X&ei=nJdJVa-gIcyUuATApoGQDg&ved=0CDAQuwUwAw#v=onepage&q=derinkuyu&f=false. 
  3. ↑ a b c d e Matthew Bennett (1998). The Hutchinson Dictionary of Ancient & Medieval Warfare. Taylor & Francis. p. 99-100. ISBN 978-1-57958-116-9, 1579581161. https://books.google.co.id/books?id=04S4YdDarD0C&pg=PA100&dq=derinkuyu+20,000&hl=id&sa=X&ei=mNFJVeeXAsXbuQTo5oGgDA&ved=0CCYQuwUwAQ#v=onepage&q=derinkuyu%2020%2C000&f=false. 
  4. ↑ "Turkish Department of Culture". Diarsipkan dari versi asli tanggal 2020-02-18. Diakses tanggal 2016-11-16. 
  5. ↑ Woodard, Roger D. The Ancient Languages of Asia Minor.
  6. ↑ Swain, Simon; Adams, J. Maxwell; Janse, Mark (2002). Bilingualism in Ancient Society: Language Contact and the Written Word. Oxford [Oxfordshire]: Oxford University Press. pp. 246–266. ISBN 0-19-924506-1. 
  7. ↑ Horrocks, Geoffrey C. (2010). Greek: A History of the Language and Its Speakers. John Wiley & Sons. p. 403. ISBN 978-1-4051-3415-6. 
  8. ↑ a b Darke, Diana (2011). Eastern Turkey. Bradt Travel Guides. pp. 139–140. ISBN 978-1-84162-339-9. 
  9. ↑ Kinross, Baron Patrick Balfour (1970). Within the Taurus: a journey in Asiatic Turkey. J. Murray. p. 168. ISBN 978-0-7195-2038-9. 
  10. ↑ Dawkins, R. M. (1916). Modern Greek in Asia Minor. A study of dialect of Silly, Cappadocia and Pharasa.. Cambridge University Press. p. 17. https://archive.org/details/moderngreekinas00hallgoog. Diakses pado 25 Oktober 2014. 
  11. ↑ a b Dawkins, R. M. (1916). Modern Greek in Asia Minor. A study of dialect of Silly, Cappadocia and Pharasa.. Cambridge University Press. p. 16. https://archive.org/details/moderngreekinas00hallgoog. Diakses pado 25 Oktober 2014. 
  12. ↑ Rodley, Lyn (2010). Cave Monasteries of Byzantine Cappadocia. Cambridge University Press. p. 1. ISBN 978-0-521-15477-2. 
  13. ↑ Sometimes Interesting. "Derinkuyu & The Underground Cities of Cappadocia". Sometimes Interesting. Diakses tanggal March 29, 2015. 
  14. ↑ Nevşehir > Subterreanean Settlements of Cappadocia > Structural Features[pranala nonaktif permanen]

Bacoan lanjutan

[suntiang | suntiang sumber]

Pautan lua

[suntiang | suntiang sumber]
Diambiak dari "https://min.wikipedia.org/w/index.php?title=Kota_bawah_tanah_Derinkuyu&oldid=2820443"