Kosovo

Kosovo atau sacaro rasmi Republik Kosovo adolah sabuah nagara di Eropa Tenggara jo pangakuan diplomatik tabateh. Kosovo talatak di tangah Balkan, babatehan jo Serbia di utara jo timur, Makedonia Utara di tenggara, Albania di barat daya, sarato Montenegro di barat.^[1] Sabagian gadang wilayah nagara ko bagunuang-gunuang jo babukik. Tapi selatan jo tenggara dipisahan dek Pagunuangan Sharr,^[2] sarato Pagunuangan Alpen Albania mandominasi tapi barat jo gunuang tatingginyo iolah Gjeravica.^[3][4]

Nagara ko sacaro sapihak mandeklarasian kamerdekaannyo dari Serbia pado 17 Februari 2008^[5] nan diakui dek 104 nagara anggota PBB. Walaupun Serbia indak maakui Kosovo sabagai nagara badaulaik, namun nyo manarimo otoritas pamarentahan lembaga-lembaga Kosovo sabagai bagian dari Pajanjian Brussels 2013.^[6] Politik Kosovo balansuang dalam karangko republik demokrasi perwakilan parlemen multi-partai, di mano Presiden adolah kapalo nagara jo Pardana Mantari sabagai kapalo pamarentahan.^[7] Kuaso legislatif dipacik dek Majelis Kosovo nan mampunyoi 120 anggota dipiliah untuak maso jabatan ampek tahun.^[8] Paradilan tadiri dari Mahkamah Aguang jo paradilan di bawahnyo, Mahkamah Konstitusi, sarato lembaga kejaksaan independen.^[9][10]

Badan Statistik mampakiroan panduduak Kosovo pado tahun 2021 bajumlah sakitar 1.774.000 jiwa.^[11] Pado tahun 2023, angko harapan hiduik katiko lahia sacaro kasaluruahan iolah 79,68 tahun,^[12] sarato tingkek kasuburan total 1,88 anak lahia per padusi.^[1] Pado tahun 2019, panduduaknyo tadiri dari 92% urang Albania, 4% Serbia, 2% Bosnia, 1% Turki, 1% Rumani, jo <1% Gorani.^[13]