Goæra di trent'agni

Guæra di trent’agni, insemme di conflíti che se desgugettan tra o 1618 e o 1648 in Œüropa e comporton di prefondi mutamenti di assetti politico-economichi.

I origgine de questa longa guæra van çercæ into vigô assonto da-o protestanteximo doppo a Paxe de Aogusta (1555), into decizo attezamento antiprotestante da Gexa e di prìnçipi catollichi sotta a spinta da Controriforma, inti conflíti generæ inti equilibbri œüropei da-a poxiçion centrâ da Germania e quindi inte tenscioin politiche, religioze e constituçionæ a l'interno de l'Impeo, manifestæse za co-a formaçion into 1608-09 d'aliançe contrapposte da-o ponto de vista religiozo.

L’eleçion a re de Boemia de l'arçiducca Ferdinando (1617) e o conseguente arivo di aministratoî cattolichi, a provocò a rebellion (defenestraçion de Praga, 23 mazzo 1618) ch'a segna convençionalmente o començo da guæra. Respinte e truppe imperiæ scin a Vienna, i Boemi, deciarao decheito o Ferdinando, elezettan a-o trono o Federigo V, elettô do Palatinato, restando però izoæ into fronte protestante e subindo a sconfita da Montagna Gianca a ovest de Praga (8 novembre 1620) da parte de truppe impeiæ guidæ da J.T. Tilly. A guæra a mesciò aloa into Palatinato, donde into 1623 o Tilly o sconfisse i prinçipi protestanti, sostegnui ascì da-i stati generæ olandeixi, mentre into campo catollico, into quæ o Mascimilian de Bavea o l'aiva ótegnúo a dignitæ elettorâ a-o posto do Federigo V, i Asburgo de Spagna ean aliæ a quelli d’Aostria. O conflíto o divègne œüropeo co-a rebellion in Valteliña di cattolichi contra i Grixoin protestanti, ch'a permisse o conligamento traverso a valle tra Aostria e Spagna (1622) contra a quæ intervègne a França (Paxe de Monçon 1626).

Inta Germania settentrionâ o ricompattamento do fronte protestante sotta re Crestian IV de Danemarca o no dette di exiti poxitivi pe e sconfite inflite into 1626 da-o A.W.E. von Wallenstein a-o conte de Mansfeld a Dessau e da-o Tilly a-o mæximo Crestian IV a Lutter. E perdie teritoiæ sancie da-a Paxe de Lubecca (1629) consentin l’attoaçion do cian de recattolichizaçion imperiâ (editto de restituçion, 6 março 1629).

In Italia i Asburghi ean in difficortæ a caoza da succescion do ducca Carlo de Nevers a Mantoa e into Monferrâ doppo a morte do Viçenço II Gonzaga (1627). L’ocupaçion do Monferrâ e da pœu de Mantoa a provocò l’intervento françeize (ocupaçion de Suza e Cazâ) che, ótegnua l’aliança do ducca de Savoia, a l'áseguò Mantoa e o Monferrâ a-o Nevers (Paxe de Cherasco, 1631).

O Richelieu o l'ariescì intanto a provocâ l’intervento do Gustavo II Adorfo de Sveçia contra i amie teritoiæ do Wallenstein, l'ezerçito do quæ o fu desfæto da l'imperatô sciu prescion di prinçipi todeschi in cangio do so agiutto contra i Svedeixi (Dieta de Ratisboña, 1630). Tuttavia o Gustavo II Adorfo o l'ariescì, co-o sostegno françeize e l’aliança de Brandeburgo e Sassonia, a avei a megio in sce l'eserçito do Tilly e a zonze a Praga. Cheito o Tilly, l’imperatô o reciammò o Wallenstein, ch'o se scontrò co-o sovran svedeize a Lutzen (16 novembre 1632), dove questo, pù guaagnando, o trovò a morte. L’iniçiativa di Svedeixi e di prinçipi protestanti tuttavia a proseguì (Liga de Heilbronn), dementre ch'o Wallenstein o inandiò de trattative segrette con Sveççia, França e Sassonia ma, sospettao de tradimento, o fu assascinao o 25 frevâ 1634. A vittoia di Impeiæ e Bavaixi, rinforçæ da de truppe spagnolle, a Nördlingen (6 settembre 1634) e a succesciva Paxe de Praga (1635) porton a 'n acordio tra l’imperatô e l’elettô de Sassonia in cangio da sospenscion de l'editto de restituçion.

No cessava invece l’iniçiativa françeize: o Richelieu o stabilì una re' d'aliançe œüropee in ciave antiasburghica (Olanda, Sveçia, dotrei prinçipi protestanti), impadronindose ascì d'Arsaçia e Loræna e menaççando i Paixi Basci Spagnolli e o Milaneize. Inte 'n primmo tempo e risposte ispano-imperiæ fun efficaxe, zonzendo a menaççâ Pariggi, ma da-o 1640 a guæra a s'orientò in favô di Franco-Svedeixi. O Ferdinando III o fu abbandonao da Brandeburgo e Bavea, lasciando averta a stradda fin squæxi a Vienna a i armæ svedeize. I Spagnolli vègnan indebolii da-a rivotta da Catalogna, da-a secescion do Portogallo e da-e sconfite de Cazâ (arvî 1640) e Rocroi (1° mazzo 1643). L’oportunitæ da paxe a l'aparse sempre ciu evidente a-i Imperiæ: e trattative se protraettan da-o 1644 a-o 1648, ma a Paxe de Vestfalia a poze terme solo a-a guæra con l’Impeo, mentre quella contra a Spagna a saiæ duâ ancon fin a-o 1659.

• Wikimedia Commons a contêgne di files in sce Goæra di trent'agni