Sistem solal
La sistem solal es la sistem de la Sol, la planetas liada par gravita, e otra ojetos cual orbita la Sol. La Sol es un stela, e otra stelas pote es ance solas con sua planetas propre. De la cosas cual orbita la Sol direta, la oto la plu grande es la planetas, e la resta es cosas plu peti, como planetas nanin, asteroides, e cometas. De la cosas cual orbita la Sol nondireta, pd satelites o lunas, du es plu grande ca la planeta la plu peta, Mercurio.
La sistem solal ia formi 4.6 bilion anios a ante de la colasa par gravita de un nube moleculal jigante. La majoria de la masa de la sistem es en la Sol, con la majoria de la resta contenida en Jupiter. La cuatro planetas plu peti e plu prosima a la Sol, Mercurio, Venus, Tera, e Marte, es prima composada de roca e metal. La cuatro planetas esterna es planetas gasosa. La du la plu grande, Jupiter e Saturne, es jigantes gasosa, composada xef de idrojen e elio; la du la plu distante, Urano e Netuno, es jigantes jelosa, composada xef de materia jelin con temperatures de fonda alta, como acua, amonia, e metano. Tota oto planetas ave orbitas cuasi sirculo cual es contenida en un disco cuasi plata, nomida la eclisica.
La sistem solal conteni ance ojetos plu peti. La sintur de asteroides, cual esiste entre la orbitas de Marte e Jupiter, conteni xef ojetos composada, como la planetas terin, de roca e metal. Estra la orbita de Netuno es la sintur de Kuiper e la disco sperdeda, cual es cuantias de corpos composada xef de jelo. E estra estas es un cuantia nova descovreda de cosas nomida sednoides. En esta grupos es multe ojetos sufisinte grande ce los ia es sferida par sua propre gravita. Alga ojetos es nomida planetas nanin. Los cual es nomida inclui la asteroide Ceres e la du ojetos estra Netuno: Pluto e Eris. En ajunta a esta du rejiones es otra cuantias de corpos peti, incluinte cometas, sentauros, e polvo interplanetal cual viaja libre entre rejiones. Ses de la planetas, cuatro de la planoetas nanin, e multe otra corpos es orbitada par satelites natural, comun nomida lunas. E cada de la planetas esterna es ensircada par anelos de polvo e otra ojetos peti.
La venta solal, un corente de particulas cargada flue a estra de la Sol, creante un rejion bolin en la media interstelal nomida la eliosfero. La eliopausa es la punto a cual presa de la venta solal es egal a la presa oposante de la media interstelal. Lo estende a la borda de la disco sperdeda. La nube de Oort, crededa como la fonte de cometas con periodos longa, pote ance esiste sirca miles veses plu distante ca la eliosfero. La sistem solal es locada en la Braso de Orion, 26000 anios de lus de la sentro de nosa galasia, la Via Letin.
| La sistem solal | model | |
| Planetas: | Mercurio | Venus | Tera (Luna) | Marte | Jupiter | Saturno | Urano | Netuno |  |
| Planeta nana: | Ceres | Pluto | Eris | |
| Otras: | Sol |Stela | Sintur de asteroides | Galasia | Nebulosa | Buco negra | Buma grande | |