Удмурт Республика

Удмурт Республика
удм. Удмурт Элькун
Удмуртская Республика

Вужпас	Дӧрапас
Канму	Роч Федерация
Статус	республика
Ыджытжык регион	Волгадор федерал кытш
Янсалӧм	5 кар кытш, 25 район
Веськӧтлан шӧрин	Ижкар
Медыджыт каррез	Глазкар, Вотка, Можга, Сарапул
Аркман кад	1920' нояб 4' лун' во
Азьмурт	Волков Ӧльӧксан Ӧльӧксандрович
Веськöтлан кыввез	удмурт, роч
Оліссез (2010' во во)	1 526 514 (29-ӧт места)
Оліссезлӧн тшӧкыта	36,3 морт/км²
Чужанвуж сьӧрті тэчас	удмурттэз, роччез, тотара, мари, чувашшез, бесермана
Эскан сьӧрті тэчас	Буркывья вичку
Мувывтор	42 061 км² (ва - 0,6 %, 57-ӧт места)
Кад кытш	+3
Джендӧтӧм	udm
Телефон код	+7 341
Пошта индекссэз	426000-426999
Автомобиль код	18, 118
Веськöтланлöн сайт

Удму́ртму (удм. Удму́рт Эльку́н, роч. Удму́ртия) – удмурт отирлӧн горт му, асъюралан республика, Роч Федерация видзантор, пырӧ Волгадор федерал кытшӧ.

Тыр нимыс Удму́рт Респу́блика, удм. Удму́рт Эльку́н, рочӧнжык Удму́ртскӧй Респу́блика.

Канкарыс – Ижкар.

Удмурт Республика межаасьӧ рытвылын да ойвылын Киров лапӧвкӧт, асыввылын – Перем ладоркӧт, а лунвылын сыкӧт ордчӧн куйлӧны кык мӧдік республика: Тотарму да Башкырму.

Асъюралӧм Удмурт муас лоис 1920' нояб 4' лунӧ, республика 1934' восянь.

Удмурт Республикаын медыджыт морт – азьмурт (президент). Ӧні (2000 восянь) татӧн президенталӧ роч Волков Ӧльӧксан. Парламентыс шусьӧ Кун Кенеш (рочӧнжык Государственнӧй Совет), медбӧрьяись бӧрйисьӧмась сэтчӧ 2007 годӧ, вермис «Ӧтласа Рочму». Веськӧтлӧ Кун Кенешын Соловьёв Ӧльӧксан. Удмурт Республикаись веськӧтланын юралӧ Питкевич Юрий.

Медодзза отир пондӧмась овны Кама ладорын VIII–VI сюрсвоын миян эрася одзжык. Ӧні археологгез торйӧтісӧ татісь кынымкӧ культура, кӧднӧ йитӧны перем (коми да удмурт) отир важайезкӧт – ананьинса, пьяноборса, поломса, чупчинчи.

VI–IX веккезӧ шогмӧ удмурт этнос.

XVI векӧ Мӧсква босьтӧма ойвыв удмурттэсӧ ас кипод увтӧ, а лунвыв удмурттэз сё олӧмась Козань ханмуын. Кӧр Гым Иван разис Козань (1552), удмурттэзлӧн быдӧс муэз лоисӧ ӧтік канмуын. 1731 восянь роччез пондісӧ пыртны удмурттэзӧс кристосаэзӧ.

XVIII векын – XX век пондӧтчикӧ удмурт муэз куйлісӧ янсӧтӧмӧн Ятка губернияись кынымкӧ уездын.

1920 годӧ, нояб 4 лунӧ В.И. Ленин кырымаліс РСФСР-ісь ВЦИК да СНК-лісь постановленнё, кӧда сьӧрті вӧлісӧ аркмӧтӧмӧсь куим асъюралан лапӧв (автономнӧй облась): калмык, мари да вотяк отиррез понда. Удмурт муын лоис Воттэзлӧн асъюралан лапӧв, кӧда 1932 восянь пондіс шусьыны Удмурттэзлӧн асъюралан лапӧв.

1934 декаб 28 лунӧ СССР-ись ВЦИК шуис пӧртны Удмурттэзлісь асъюралан лапӧвсӧ Удмурт АССР-ӧ.

1991 октяб 11 лунӧ Удмурт АССР-ись Медвылісь Совет лэдзис туйдӧт, кӧда сьӧрті Удмурт му босьтіс виль ним – Удмурт Республика, да лоис «суверен канмуӧн» Роч Федерация пытшкын.

Удмурт Республика куйлӧ Шӧрӧт Урал рытвылын, Кама да Ятка бассейннэзын. Мувевдӧрыс – кынымкӧ вылынін да улынін. Медвылын чут (332 м) куйлӧ республика ойвыв-асыввылас Камайыв вылынінын. Медулын чут (51 м) куйлӧ лунвыв-рытвыв ладорын, Тотармукӧт визир бердын, Ятка ю уйтын (поймаын).

Удмуртмуыс куйлӧ контитент пытшкын, сійӧн климатыс понда ассяма лоӧ жар гожум да кӧдзыт уналыма тӧв.

Во сьӧрна шӧрӧт шонтӧгыс республикаын вежласьӧ 1,0-сянь 2,5 °C-ӧдз. Медшоныт тӧлысь – июль (+17,5 +19 °C), медкӧдзыт – январ (–14 –15 °C). Максимал шонтӧггез сибӧтчӧны +37 +38 °C дынӧ. Абсолют минимум казялӧмась 1978 декаб 31 лунӧ, кӧр шонтӧгыс лажмавліс −50 °C-ся улӧжык. Ойлунся шӧрӧт шонтӧг овлӧ 0 °C-ся улынжык 160–175 лун сьӧрна, этія период пондӧтчӧ октяб помын да помасьӧ апрель пондӧтчикӧ.

Енӧжва усьӧ во сьӧрна шӧркодяс 500–600 мм кыза. Шоныт кадӧ (кӧр шонтӧгыс 0 °C-ся вылынжык) енӧжваыс усьӧ годся суммаись 65–75 %. Медуна енӧжва петӧ июль коста (62–74 мм), медъетша – февраль коста (24–32 мм). Медбура вадӧтчӧ енӧжсяняс республикалӧн ойвыв-асыввыв тор, медумӧля – лунвыв-рытвыв.

Лым пуксьӧ нояб шӧрланьын, сёрмас кӧ – декаб пондӧтчикӧ. Медпыдын лымыс овлӧ март шӧрын – 50–60 см кыза. Муыс куйлӧ лым увтын 160–175 лун сьӧрна.

Меддона мупытшся шедтасӧн лоӧ мусир. Адззӧмась 300 млн тонна, шедтӧны быд во 10 млн тонна. Быдсӧн эмӧсь мусирлӧн 114 шогманін, ныись 72 лӧсьӧтӧны, а 32 лӧсьӧтӧмась ни кыскӧм понда.

Удмурт муын эм торфлӧн 619 куйланін, ӧтласа ыждаыс – 204,7 млн тонна.

Эмӧсь руд да из шом. Медыджыт шома районнэз – Алнаш да Камбарка, пласттэз куйлӧны 1000–1500 м пыдынаын. Медыджыт шогманін – Голюшурма.

Республика му пытшкын куйлӧны сідзжӧ извесняк, доломиттэз, строитчан лыа да кӧдза, кирпич керан сёй, строитчан из, песӧка-кӧдза сорассэз. 2009 во пондӧтчикӧ Удмурт Республикаын лыддисӧ колана шедтассэзлісь 369 шогманін да 87 мыччисянін, сы лыдын 433 – строитчан материаллэзӧн.

Удмуртму куйлӧ Кама бассейнын. Татӧн уна ю да юок, кӧдналӧн ӧтласа кузя вӧлі бы 30 сюрс км.

Удмурт Республикалӧн кыкнан медыджыт ю – Кама да Ятка – пондӧтчӧны республика ойвылын, но кынымкӧ километра бӧрті петӧны сы визиррез сайӧ. Йӧз муэзӧт уна сё километра кывтӧм бӧрын нія бертӧны Удмуртмуӧ лунвылӧттяс.

Шорресӧ (10 км-ся дженытжыккезӧ) республикаын лыддьӧны 7000 мымда, учӧт юэсӧ (10-сянь 100 км-ӧдз) – 368-ö, шӧрӧт ыжда (100-500 км) да кузьжык юэсӧ – 17-ö.

Удмурт Республикаись медыджыт юэз:

Юэз унажыксӧ тыртчӧны лымӧн. Йысявлӧны нія нояб мӧд джынын, а оссьӧны апрель мӧд джынын. Ыджыт ва пондӧтчӧ апрель шӧрын да видзсьӧ ӧтік тӧлысь дыра ичӧт юэз вылын да 40–45 лунӧн ыджыт юэз вылын. Судноэз ветлӧны токӧ Кама да Ятка кузя.

Удмуртмуын 600-ся унажык пруд, медгырисьӧсь Ижын, Воткаын, Камбаркаын да Пудемын. Лунвыв-асыввывсянь да лунвывсянь республика миськассьӧ Вотка да Камакывтыт вавидзаннэзӧн, кӧдна аркмисӧ Кама ю вылас ГЭС лӧсьӧтӧм бӧрын.

Ыджыт роль орсӧны муувтісь ва петаніннэз, мыйсянь Удмуртмусӧ шуӧны «ключчез ладорӧн» (удм. ошмесо шаер). Быд во ныись босьтӧны 60 млн м³ ва гортын видзӧм да юӧм понда, а сідзжӧ техника да му-видз уджалӧм понда.

Уна мупытшся ваэз Удмурт Республикаын минералаӧсь, нійӧ видзӧны веськӧтчан да бурдӧтчан керкуэзын, кисьтӧны бутыллезӧ. Минерал ваӧн медтӧдчана петаніннэз – Ӟатчаын (сульфата-кальчиа ваэз), Виль Ижын, Кизнерын да Уваын (йода-брома ваэз).

Удмурт Республикаын дорйӧны вӧр-ва то кытӧн:

• национал парк «Ожмос» (Кама ю дорын, 20,7 сюрс га)
• вӧр-ва парк «Шаркан» (Шаркан районын, 16,5 сюрс га)
• вӧр-ва парк «Усть-Бельск» (Каракулино районын, 1770 га)
• вӧр-ва дорьян заказник «Кокман» (Красногорье районын, 1,7 сюрс га)
• ботаника сьӧрті вӧр-ва дорьян заказник «Андреевскӧй пожума яг» (Красногорье районын, 901,8 га)

Оліссезлӧн лыдыс 2009 во кежӧ лоис 1 528 500 морт (2002 вося гижӧтӧм дырни вӧлі 1 570 316). Йӧзыслӧн тшӧкыта – 36,3 морт/км², карын оліссез лоӧны 67,8 %.

Кӧть титул отирӧн Удмурт Республикаын лыддисьӧны удмурттэз, медуна олӧны сёжӧ роччез. Республика лунвылын ӧті-ӧтіӧн куйлӧны мари да чуваш посаддэз, ойвылын тотара да бесерманалӧн грезддэз. Мӧдік вужа отирыс (100-ся унажык чужанвужжес) олӧны каррезын.

Кыдз вежсис пайыс республика оліссез коласын куим ыджыт отирлӧн, мыччалӧма татӧн:

Пасйӧттэз таблича сьӧрті:

1. 1926-1939 воэзӧ Удмурт асъюралӧмӧ пыртӧмась кынымкӧ рочвевья район, сысянь удмурттэзлӧн пайыс эна годдэзӧ чиніс
2. 1926 год понда удмурттэзлӧн пайыс мыччалӧм бесерманатӧг, кӧднӧ сэк лыддисӧ торйӧн.
3. 1926 да 2002 воэз понда тотаралӧн пайыс мыччалӧм кряшеннэзтӧг, кӧднӧ сэк лыддисӧ торйӧн.

Быдсӧн Удмуртмуын 2008 годӧ вӧлі квать кар (витыс ны коласісь веськыта йитчӧны республикакӧт), вит карок да 2119 посадкодь оланін (посёлоккез, посаддэз да грезддэз).

Ӧння кадӧ Удмурт Республикаын 30 муниципал юкӧт: вит кар да 25 йӧрӧс (муниципал район).

Удмурт Республикаын бура зорӧтӧма индустрия да берся чужӧма му-видз уджалӧм. Татӧн Рочму мӧдік регионнэз сьӧрті медуна виянторрез лэдзан заводдэз. Республикаын озыр мусир куйланіннэз, 2006 во сьӧрна шедтӧма 10,2 млн тонна^[9], а мусир весӧтан индустрия татӧн абу.

Удмуртмуын медуна уджаиннэз машинакерӧм, металлуджалӧм, сьӧд металлургия да пууджалӧм сьӧрті. Энергетика лӧсьӧтӧны кынымкӧ сотчанвывся токкеранін (Ижкарын, Сарапулын, Воткаын, Глазкарын) да Вотка ГЭС. Металургия сьӧрті уджаиннэз быдӧнныс Ижкарын, кисьтан удж – Ижкарын да Воткаын. Сідзжӧ лэдзӧны кокнит автоэз да автофургоннэз, бумакакеран машинаэз, подшипниккез, мусиршедтан берся, вӧралӧм да спорт понда лыйсяннэз, химия инструменттэз.

Вӧр заптӧны республика ойвыв да рытвыв муэзын, пусӧ вайӧтӧны пилитӧмторрезӧдз, керӧны мебель да керку вептӧм понда пуовӧй торрез. Уна уджаин республикаын йитчӧма Рочмуись война вылӧ уджалан индустриякӧт.

Му-видз уджалан угоддёэз босьтӧны республика мувывторись 50 % мымда. Подавидзиссез унажыксӧ вердӧны сюра гырись пода да порссезӧс, йылӧтӧны баляэзӧс да гортся кайезӧс. Быдтӧны Удмууртмуын рудзӧг, шогді, ид, зӧр, анькытш, маис, шондіюр, лён, рапс, картов, карч да сёдан культураэз.

Удмурт Республикаын уджалӧ дзир ӧтік аэропорт – Ижкарын. Сы туйӧ ыджыт роль орсӧ кӧрттуй транспорт. Удмуӧт мунӧны ыджыт кӧрттуй виззез: Казань–Огырчи–Катькар, Киров–Балязина–Перем. Эм и республика пытшкын оланіннэз йитан кӧрттуй линияэз: Балязина–Ижкар–Алнаш, Ижкар–Вотка, Люкшудья–Калмез.

Кӧрттуй вокзаллэз

Кӧрттуй вокзал Глазкарын.		Кӧрттуй вокзал Можгаын.		Кӧрттуй вокзал Балязинаын.		Кӧрттуй вокзал Сарапулын.

Республика пырйӧт мунӧны кынымкӧ ыджыт автотуй: Р242, Р320, Р321, Р322.

1. ↑ 1926 воын СССР-ись отирӧс гижӧтӧм
2. ↑ 1939 воын СССР-ись отирӧс гижӧтӧм
3. ↑ 1959 воын СССР-ись отирӧс гижӧтӧм
4. ↑ 1970 воын СССР-ись отирӧс гижӧтӧм
5. ↑ 1979 воын СССР-ись отирӧс гижӧтӧм
6. ↑ 1989 воын СССР-ись отирӧс гижӧтӧм
7. ↑ 2002 воын РФ-ись отирӧс гижӧтӧм
8. ↑ УР-лӧн муниципал юкӧттэз
9. ↑ Удмурт муӧ инвестцияэз

• Удмурт республикалӧн официальнӧя баитчанін
• Удмурт республикаись Кун Кенеш
• Удмурт Республика, Удмурт му кузя новйӧтан
• Удмурт муись геральдика
• Удмурт Республикаын канлӧн медшӧрӧт архив
• Удмурт литература йылісь
• Удмуртология. Удмурттэз йылісь портал
• Томмез понда «Удмурт шаер» сайт
• Энциклопедия «Удмурт элькун»

Чудь-йöгра муэз

Коми му: Коми Республика | Коми Парма

Мезмыт канмуэз:
Мадьярму | Суоми Эстму
Мӧдік муэз:

Ваддяму | Вепсяму | Выруму | Ижораму | Йӧграму | Карьяла | Мариму | Мордва | Саамму| Сёлькупму | Удмуртму | Таймыр | Ямал Яран кытш | Яран кытш

 

Волгадор федерал кытш

Башкыр Республика • Киров лапӧв • Мари Республика • Мордва Республика • Макарья лапӧв •
Оренбург лапӧв • Пенза лапӧв • Перем ладор • Самара лапӧв • Саратов лапӧв •
Тотара Республика • Удмурт Республика • Симбир лапӧв • Чуваш Республика

 

Роч Федерация видзанторрез

РЕСПУБЛИКАЭЗ:

Адыгму | Аланму | Алтай | Башкырму | Бурятму | Дагестан | Ингушму | Кабарда-Балкарму | Калмыкму | Карачай-Черкесму | Карьяла | Комиму | Мариму | Мордва | Удмуртму | Тотарму | Тыва | Хакасму | Чечня | Чувашму | Якутму

ЛАДОРРЕЗ:

Алтай ладор | Байкалсай ладор | Камчатка ладор | Краснодар ладор | Краснояр ладор | Перем ладор | Саридздын ладор | Ставрополь ладор | Хабаров ладор

ЛАПӦВВЕЗ:

Амур лапӧв | Астрахань лапӧв | Белгород лапӧв | Брянскӧй лапӧв | Виль Сибир лапӧв | Владимир лапӧв | Волгоград лапӧв | Воронеж лапӧв | Вӧлӧгда лапӧв | Иванов лапӧв | Иркут лапӧв | Калининград лапӧв | Калуга лапӧв | Кардор лапӧв | Кемеров лапӧв | Киров лапӧв | Кострома лапӧв | Курган лапӧв | Курскӧй лапӧв | Ленинград лапӧв | Липецкӧй лапӧв | Магадан лапӧв | Макарья лапӧв | Мӧсква лапӧв | Мурман лапӧв | Новгорт лапӧв | Омва лапӧв | Орёл лапӧв | Оренбург лапӧв | Пенза лапӧв | Псков лапӧв | Ростов лапӧв | Рязань лапӧв | Самара лапӧв | Саратов лапӧв | Сахалин лапӧв | Свердлов лапӧв | Симбир лапӧв | Смоленскӧй лапӧв | Тамбов лапӧв | Тверь лапӧв | Томва лапӧв | Тула лапӧв | Тюмень лапӧв | Челяба лапӧв | Ярославль лапӧв

АСЪЮРАЛАН ЛАПӦВ:

Еврей лапӧв

АСЪЮРАЛАН КЫТШШЕЗ:

Яран кытш | Йӧгра кытш | Чукотка кытш | Ямал Яран кытш

ФЕДЕРАЦИЯ ВИДЗАН КАРРЕЗ:

Мӧсква | Петракар