Olimpiala Ludi en London, 1908
L'Olimpiala Ludi en London, 1908, od oficale la 4ma Olimpiala Ludi, esis internaciona plursporta konkurso qua eventis en 1908 en London, Unionita Rejio. Lore unesmafoye l'Olimpiala Ludi eventis en London.
La Ludi komencis ye la 27ma di aprilo e finis ye la 31ma di oktobro 1908. Ta Olimpiala Ludi duris maxim longe: 187 dii, o 6 monati e 4 dii. Partoprenis 2.008 atleti (37 mulieri e 1.971 viri) de 22 landi. Esis 110 eventi de 22 sporti. Li judikesas anke kom la 4ma moderna Olimpiala Ludi, pos la refuzo da l'Internaciona Olimpiala Komitato aceptar la nomizita "Interpozita Ludi di 1906", qui eventis en Athina kom Olimpiala Ludi.
Diferanta de la Ludi en Paris (1900) e Saint Louis (1904), qui esis nesignifikinta e kaosale organizita kompare l'Universala Expozuri Internaciona organizita en ca urbi dum la sama epoko, la ludi en London recevis plu multa atento, nam 2/3 de omna konkursi eventis en du semani di julio, ed en singla loko.
Komence, Roma elektesis en 1904 kom eventeyo por la Ludi en 1906. Tamen, ye la 7ma di aprilo 1906 volkano Vesuvio eruptis e devastis Napoli. La kapitali destinata a la Ludi en Roma riasignesis por rikonstruktar Napoli. Do, nova eventeyo bezonesis, e London selektesis. Pose, Roma esis l'eventeyo por la Ludi en 1960.
Kelka fakti
[redaktar | redaktar fonto]
- La disto por kurar maratono kreskis de 42 km til 42 195 metri.
- Italian atleto Dorando Pietri esis l'unesma qua sucesis parkurar la maratono, ma ilu desqualifikesis pro recevar helpo da kelka personi lor falo dum kurado.
- Unesmafoye, eventis konkurso di agro-hockey en l'Olimpiala Ludi. Sis esquadi partoprenis. Anglia, Skotia, Irlando e Wals konkursis separite. Anglia ganis ora medalio, Irlando ganis arjenta, dum ke Wals e Skotia dividis bronza.
- Unesmafoye en l'Olimpiala Ludi, atleti marchis sub la standardi di lia landi.
- Atleti de Finlando refuzis marchar sub la standardo di Rusa Imperio. Kelki marchis sub la Finlandana standardo, ed altri refuzis uzar irga standardo.
- On obliviis desfaldar la standardo di Suedia en la stadio. Konseque, Sueda atleti refuzis partoprenar l'inauguro-ceremonio.
- Australia e Nova-Zelando partoprenis kom unika esquado, nomizita Australazia.
- L'Otoman imperio, sub la nomo "Turkia", partoprenis unesmafoye.
- Sueda Oscar Swahn, qua ganis du ora medalii por pafado vers nefixa emo, divenis la maxim olda konkursanto en la historio dil Olimpiala Ludi.
- Unionita Rejio ganis ora medalio por futbalo.
- Unionita Rejio ganis anke omna 5 ora medalii por boxo ed omna 6 ora medalii por teniso, sur kombateyo kovrita e nekovrita .
- De la 6 konkursi pri natado, Unionita Rejio ganis ora medalii por 4. Usa ganis ora por 100-metra mixita stilo, e Germana imperio ganis ora por 100-metra retro-stroko.
Medalii ganita
[redaktar | redaktar fonto]
Yen la listo di landi qui recevis adminime 1 bronza medalio en 1908.
| # | Lando | Ora | Arjenta | Bronza | Entote |
|---|---|---|---|---|---|
| 1 |  Unionita Rejio |
56 | 51 | 39[1] | 146 |
| 2 |  Usa |
23 | 12 | 12 | 47 |
| 3 |  Suedia |
8 | 6 | 11 | 25 |
| 4 |  Francia |
5 | 5 | 9 | 19 |
| 5 |  Germania |
3 | 5 | 5[1] | 13 |
| 6 |  Hungaria |
3 | 4 | 2 | 9 |
| 7 |  Kanada |
3 | 3 | 10 | 16 |
| 8 |  Norvegia |
2 | 3 | 3 | 8 |
| 9 |  Italia |
2 | 2 | 0 | 4 |
| 10 |  Belgia |
1 | 5 | 2 | 8 |
| 11 |  Australazia |
1 | 2 | 2 | 5 |
| 12 |  Rusia |
1 | 2 | 0 | 3 |
| 13 |  Finlando |
1 | 1 | 3 | 5 |
| 14 |  Sudafrika |
1 | 1 | 0 | 2 |
| 15 |  Grekia |
0 | 3 | 0 | 3 |
| 16 |  Dania |
0 | 2 | 3 | 5 |
| 17 |  Bohemia |
0 | 0 | 2 | 2 |
| 17 |  Nederlando |
0 | 0 | 2 | 2 |
| 19 |  Austria |
0 | 0 | 1 | 1 |
| Totali | 110 | 107 | 106 | 323 | |
Referi
[redaktar | redaktar fonto]- ↑ 1,0 1,1 La statistiko de l'Internaciona Olimpiala Komitato (IOK) prizentas la bronza medalio ganita da Dorothy Greenhough-Smith kom Germana, ne Britaniana. Yen la korekta statistiko.