Ayasulemya (suterot)

Ayasulemya tir berpot ke Émile Zola sanegayan bak 1890. Tir san-pereafa karba ke Rougon-Macquart nevatum. Sutesik va intafa envara va malyura is kelotafa tamava belcon ruer. Bat berpot jadion zo torigir da vas toloy gradilik donarir  : taneon Jacques Lantier tegibik voxis Lison lizimeltasiko renano gan battel loeke dam ayikya. Nope wite radane gu ref ardialaf suterotind, va milsareikeem ba sanegara lemister. Toloya boera is konaka pisonara is toloya skaya zo pimtad, i bifa loote koswayana gan geltrafi tegi, sedme giltira ke Zola. Berpot vas jontika rupa isu dilaf koredik doburer voxise tir berpot icde konolerokuca tisa stas fem ke Rougon-Macquart nevatum. Batdume Jacques nope ruyatfamuca pilkafa gu intafa yasa bunger. Tir nazbeikye ke Gervaise Macquart is Auguste Lantier ( koredik ke Sagondexo berpot ). Ison, Ayasulemya va rijna mu Zola ta rankera va titolera adalafa gu tena ke Toleaf Gindugal zanudar ( bifa dere tcalasa va tena ke doca ke Rougon-Macquart nevatum ).

Berpot icde lan Roubaud lapis ko Paris az korojutus va dilint kev malyerotafa buntura zo tozur. In tir titokilik ke golda koe Le Havre, i tezaf unenik memalyon temeyen gan anelik. Dositanon gan Séverine kurenikya, kosmar da ina mea tir ketafa mali sardugal viele gan Grandmorin vanpiyis nendasik is taneatisik ke sistu zo boeyer. Bat warzot va in tulickarsar : acum in djukuraytatar, do Séverine tudofugawese sutelason va denon komonasa twa.

Rupa va Jacques Lantier azon istfir, i va Lantier tis 26^-daf is tegibik dene Paris-Le Havre sarva. In bak udorugal gan Phasie loviele zo vistaler, i gan povakikya sokesa koe oblarotxe kene mila kelotafa sarva koe Croix-de-Maufras widel. Misard kurenikye ke Phasie tir oblarotsusebik. Gruper da kurenya va 1000 franc talolk mali kures viel palser nume zidegar kiren ine voldjuwalzilir. Sin do Flore nazbeya blid. Flore va Lantier nekev jontike progepese nesasikye renar. Sin toz ilagid viele Lantier laizon pisonason belger. Tire maninde gibelger. Meaytatason otcer. Lantier va lana pisonara koe impadimak inton gistan fokozwir. Taneon stivawer azon Misard tire kadimion givar da lano alto kene kelotxa su zo trasir, i alto tiso telo ke Grandmorin taneatisik.

Diregazdon moi gomilara ( bak lan taneaviel ), Roubaud va kobas vielcek nogloton tozur. Ba 9h30 kutcupsa dakter : Grandmorin al zo aytar. Larde Roubaud is kurenya koe impadimak xof gu gomilara al koyad, wetce vrutasik zo kogilded. Roubaud va deolafa kakevera va kosik kle kareizur voxe ruyer da va arcoba me gruper isen kurenya gruyer. Azen Lantier silukon zo kogilder : ruyer da va adjubera al kozwir voxneke va adjubesik me grupilkomodar.

Kogrupas malyesik vajgeyen gu arienta tir yoltkiraf gu Denizet. Va lan tubizik yoltkiraf gu Cabuche soper. Louisette nikya ke Cabuche is nazbeik ke Misard gan Grandmorin co zo aliepeyer. Palsotik va Roubaud tolonga iskemamba va mona gan Grandmorin soe uculeper. Denizet radimi konaka vrutara askir da sin ko olkoba lanid lize Lantier tigir. Bantan ve gildar : Roubaud tir adjubesik. Voxe stivawer, kontenon gan vosesa disukera ke Séverine. Roubaud dere gildar da Lantier va kotcoba gruper nume erur da bantan va kurenya ko Paris dostitatar. Batkane in pokoler da inya soltegitir enide Lantier wan stivaweter. Viele Séverine koe Paris tigitir, pune va Camy-Lamotte eldik djumauzur, tatceteson va tarulera va Roubaud. Voxe va Denizet abdion tis kozwir, nume klabur aze soe tere silukon mamler. Voxen keyaksera anton jupar da uculera ke eldik zo tupoad kiren twa suteyena gan Séverine pu kosik al zo kosmad. Séverine va bazaxo bulur, laneson da fu zo ranker. Camy-Lamotte is Denizet nope gaderopafa lemistera ke arienta, va ikatcura klabud. Voxen kogrupas malyesik va eldik tere buiver da engunik tir Cabuche. Bat toloy tegisik va sint gu kalbulura va korolara dotrakad isen Denizet zo ticekavar. Séverine is Lantier koo nuda ke Paris zikad. In erur kase ine tir gunafe voxe di meur. In wan tir rodaxas neke va renara dakter. Aze kan Lison lizimeltasiko van Le Havre dimlapir.

Arti tanoy aksat, kotcoba al zo nuvulkur : blira koe golda ke Le Havre va salt algin narir. Antaf setikeks ke gomilara : trula dubieyena bas alto ke Grandmorin az palseyena leve azeba ke kraba ke Roubaud isu erba. Jacques tolon ok baron safteon gilauzur, ganenon gan tolonga adre solponawesa nope kavanara ke Jacques is Séverine. Bantan koe tamba ke golda va sint katrasid. Inya tere kempar volsen Lantier aytatason gin belger.

Miledje Roubaud va liwombura loon skeur maneke toz bozar. Loeke va erbak ke xonukik govofalur ; voxe gan Séverine bansielon zo onser. Kadimion Jacques is Pecqueux yeldasik ke sistu do kobasikeem don Séverine gan noldotcek koe Croix-de-Maufras zo rebokad. Flore is Misard is Cabuche greled. Sin dene Misard kotote gelbed. Bam Jacques gan ziavya zo givar da ina gan Misard ta dimnarira va intafa jwama zo jivar. Kadimion Flore va Jacques is Séverine sinton kutcase wir. Voxazen lizimeltasiko zo dimempar numen impadimak gin rodelapir. Wori Lison tir bakayan, tuvolkalason va Lantier.

Viele Séverine is Jacques va Paris artlapid, pune gan Pecqueux gu kenibera denon zo komonad. Radimida belcon al ilagid, pune fertikya beomar : va bogara va Roubaud tizafe kurenye movur, ise al tir fertik ke Grandmorin, ise va intafa dofuguca bal adjubera pintapason dere movur. Bata movera va pisonasa degruca ke Jacques divmodar numaze gazdon gonotcer enide va kabera va wed kabdueon tigis moe azega divvawar. Viele diveon tigir, pune va ayikya koe impadimak suzdar, nyapenon gan awalkesisa wayeda. Bam deneon divmoder, mesetikeson va tenulera ke suzdara.

Roubaud gan liwombusa degruca wan zo stoler nume tere va arsu ke bidiaks ke xonukik tere falur. Radimida Séverine va acku ke kaip al vewar, pune batcer nume ko vask silukon djukonarir. Voxen antafa trula zavzagir ; ine pu Jacques kevnales zilir. Banviele Roubaud va sin foredones onser. Voxe me kategir kire gan divlapusa ombusa blira zo jidier. Acum fertafa tolonga tunuyanon re roblir, vaxe Lebleu W^-ya tisa vegungik dure pitcas. Wori osk, koe meem ke Séverine, kultaf rotok ke Jacques adre vonewer, voxosk guyunderaja ke Lison nuvulkuyus va gloga va in loloon vanolapad. Soe Séverine va Jacques loloon renar nume va Roubaud cugeke toz bogar.

Ine va abdumimaks aytatas va kurenye az mallapitis ko Amerika eksudar. Jacques iltrakur, me gruper. Soe lanmielon, sin xuye lanid, aytatason va Roubaud. Voxen ba dendara : « Kotcoba ke in atitsuyur, laizon. Me, vol ! Me fu aytar ‼» Bam Séverine otcer. Kadimion Lebleu W^-ya zo aloyar numazen Séverine va inafa vlardafa kraba rovokosoker. Phasie tere mulufter. Misard me zo vanolar ise va erba ke awalkik giopon kaaneyar. Flore luxeon abdiwir da va impadimak safteon rembures va Jacques is Séverine fu divwitokar. Taneatomon tiner. Soe toleatomon, koyasik « va bata kovudara wiyid : impadimak ranyayar, peroye omaze va sint ticniyid aze ton voltazukafe egale dem empa, relkon tweson dimelubeyed ». Lison ilblir, do yon xonukeyes okol is lantanya dem nimateem arbeyen bene jaday is tanoya ma gabeyena vwon ice epita...

Soe Jacques tuvawelawer, maltiolteyenon gu swela gan Flore. Voxe divmodeson vangruper : « Lison mea krulder ; numen ikuza va budena guta divnir ise re traspur, molavason va tcoreem ». Tere Séverine va Jacques koe Croix-de-Maufras malstar lizu Flore piksenon otcer aze kser, abdulanison kev lapis impadimak. Bak vogonugal koe Croix-de-Maufras, Jacques va Misard dure kaaneyas va palseyena tufa, is Cabuche duxibese va Séverine belcon wir. Pu Séverine pulvir aze va megeltraf renas mielcek tiskir : « Bat mielcek tiyir tan lolujaf renas, i tel lokiewaf, i tel antaf edje sin pesteyed dojen is sinton griawis ». Nopeon tere zo buiver da va Roubaud di gonaytar.

Direvielon, sin rape intaf azed va artlanira ke Roubaud ked. Voxen Séverine tir dem mielklaim numen « relkafa deona » va Jacques gire konarir. Viele Séverine vanlanir, pune in va wed moe azega narir aze « va nubok balier isen wed va bibera ko larida ceptayar ». « Exaksunapafa daava, granafa pojara » va in bam levmadar, « ton enkeldaskira va kotabafa jugemera », dum viele Jacques va awalkoda ke Grandmorin wiyir. Voxen Jacques gan tegi tere zo tukultar nume koe miel yater. Cabuche va otcesik wir voxe me kagruper ; va mona kolanir, va awalkoda ke Séverine wir aze pikseson ko meem va ina narir nume gu fortey va int volins besar. Roubaud is Misard batviele artlanid.

Ironokaf luz fralekar. Liza arti baroy aksat radimi askiks tir, isen Jacques va warzafo lizimeltasiko do Pecqueux star. Bantan motcar kire folir da battel va Philomène inafa fertya gililagir. Jacques gilaskir kire batkane lasugruper kase belgera dimfid voxen batcoba tire me tir. Jiz icde pisonara ke Séverine zo tozur ; Cabuche is Roubaud moe koridanikafa starka tigid. Bantan va pisonara va Grandmorin abdion al kowelidar voxe me al zo folir. Tire Camy-Lamotte jadif suteptik va anteyara va dadina twa ke Séverine lodam razdara gorar. Toloy koridanik gu durefa poana kobara tere zo lanzad. Wori edje Jacques is Philomène koo tapedafa nuda lanid, pune « stezafa olegara gin nariyir numen Jacques vere riyomeyer ». Acum otcer edje Pecqueux va Philomène alier.

Arti abic viel, rwama wal Jacques is Pecqueux vinustar edje sin va kametca vajayana gu sayakik mallapis van geja stad. Mo keltxa lubed numaze gan krafol zo kuftosad ; impadimak oviskon wan vulter ise ko golda tantanon farusa mea vukir. Berpot tenuwer ba :

• Émile Zola : Francavaf suterotik ( 1840-1902 )
• Francavafo xanto, dene Wikibooks : La Bête humaine

t · p · b Rougon-Macquart yasa, nevatum ke Zola
Les Rougon-Macquart, Histoire naturelle et sociale d'une famille sous le Second Empire ( Rougon-Macquart yasa, Tuwavafa is seltafa izva ke lana yasa bak Toleaf Gindugal )
1870-e sanda	La Fortune des Rougon ( Tufa ke Rougon yasa ) • La Curée ( Guinera ) • Le Ventre de Paris ( Jivot ke Paris ) • La Conquête de Plassans ( Levrotira va Plassans ) • La Faute de l'abbé Mouret ( Derka ke Mouret gertikye ) • Son Excellence Eugène Rougon ( Eugène Rougon tabexik ) • L'Assommoir ( Sagondexo )
1880-e sanda	Une page d'amour ( Lanu bu ke rena ) • Nana ( Nana ) • Pot-Bouille ( Pot-bouille ) • Au Bonheur des Dames ( Kalaxe ke weltikya ) • La Joie de vivre ( Blisa daava ) • Germinal ( Germinal ) • L'Œuvre ( An grot ) • La Terre ( Tawa ) • Le Rêve ( Klokaks )
1890-e sanda	La Bête humaine ( Ayasulemya ) • L'Argent ( Erba ) • La Débâcle ( Atitsura ) • Le Docteur Pascal ( Pascal kurmikye )