Anopheles

Anopheles
Clasificación científica
Reinu:	Animalia
Filu:	Arthropoda
Clas:	Insecta
Orde:	Diptera
Familia:	Culicidae
Subfamilia:	Anophelinae
Xéneru:	Anopheles
Distribución
Especies
Algunas especies: Anopheles aguasalis Anopheles albimanus Anopheles atroparvus Anopheles beklemishevi Anopheles coustani Anopheles crypticus Anopheles culicifacies Anopheles darlingi Anopheles farauti Anopheles forattinii Anopheles funestus Anopheles gambiae Anopheles grabhamii Anopheles hailarensis Anopheles halophylus Anopheles hyrcanus Anopheles introlatus Anopheles kosiensis Anopheles latens Anopheles maculipennis Anopheles minimus Anopheles moucheti Anopheles nili Anopheles nuñeztovari Anopheles ovengensis Anopheles pampanae Anopheles peytoni Anopheles quadrimaculatus Anopheles rennellensis Anopheles rivulorum Anopheles stephensi Anopheles triannulatus
Consultes
[editar datos en Wikidata]

Anopheles ye un xéneru de mosquitu de la familia Culicidae qu'habita en práuticamente tol mundu incluyendo Europa, África, Asia, América y Oceanía, con especial intensidá nes zones templaes, tropicales y subtropicales. Esisten 465 especies formalmente reconocíes d'Anopheles, de les cuales 50 pueden tresmitir les cuatro especies distintes de parásitos del xéneru Plasmodium, causantes de la malaria humana (yá que esisten munches otres especies de Plasmodium que causen malaria en mures (P. gergei), aves (P. gallinaceum), simios (P. yoeli), etc). La especie Anopheles gambiae ye una de les meyor conocíes, porque tresmite'l más peligrosu, el Plasmodium falciparum. N'Europa una de les especies más importantes ye Anopheles atroparvus.

Como tolos mosquitos, los Anopheles traviesen cuatro fases: güevu, bárabu, pupa y adultu. Les primeres 3 etapes trescurren en mediu acuáticu y enllárgase ente 5 y 14 díes, según la especie y los factores ambientales como la temperatura. Ye na etapa adulta, y solo nel casu de les femes, na que'l mosquitu actúa de vector de la malaria. Les femes adultes pueden vivir hasta un mes (daqué más en cautividá), siendo lo natural nun pasar de les 2 selmanes de vida.

Les femes adultes depositen ente 50 y 200 güevos. Los güevos deposítense unu a unu sobro l'agua. Carauterícense por tener una especie de flotadores a entrambos llaos. Los güevos nun aguanten la sequera. A los 2-3 díes eclosionen y de caún sal un bárabu. La eclosión puede tardar más tiempu (hasta 2-3 selmanes) si la temperatura ye baxa.

Los bárabos de mosquitu tienen una cabeza desenvuelta y prominente de la que nacen una especie de bigotes qu'utilicen p'alimentase; y, el tórax y l'abdome (ensin pates). A diferencia de munchos otros mosquitos, los bárabos de Anopheles nun disponen d'un sifón respiratoriu, y ye por ello polo que precisen tener el cuerpu paralelu a la superficie de l'agua. Los bárabos alienden al traviés d'espiráculos asitiaos nel octavu segmentu abdominal. Puesto que precisen alendar con avezamientu, dacuando xuben a la superficie. Por cuenta de esta falta de sifón respiratoriu basta con amestar a l'agua una película fina d'aceite non miscible pa esterminar una población larvar del inseutu nesa fase de la so vida. Los bárabos aliméntense d'algues, bacteries y otros microorganismos de la superficie. Solo dacuando baxen al fondu. Pa merguyase empleguen movimientos de sópitu o espasmódicos, o bien utilicen los sos bigotes bucales como propulsores.

La pupa presenta un aspeutu de "coma", vista de llau. La cabeza y el tórax fúndense nun cefalotórax y l'abdome cúrsase sobre esti. Dacuando xuben a la superficie p'alendar, gracies a los muérganos que disponen nel cefalotórax. Tres unos díes de metamorfosis, la parte dorsal del cefalotórax fiende y por él surde'l mosquitu adultu.

El lapsus que trescurre ente la deposición del güevu hasta l'apaición d'un mosquitu adultu, suel variar según la especie y vese influyíu en gran midida pola temperatura ambiental. En condiciones naturales el procesu tarda 10-14 díes, pero puede entaínar y durar solo 5 díes.

Como tolos mosquitos, los adultos tienen el cuerpu estremáu en cabeza, tórax y abdome.

• La cabeza especializóse obviamente pa l'alimentación, y tamién pa la captación de señales. Na cabeza destaca un par d'antenes llargues y bien segmentaes. Gracies a les antenes, el mosquitu puede detectar el golor de les zones de cría o'l golor d'un llugar nel que depositar los güevos. Amás de les antenes, estrémense los güeyos, la probóscide llarga y sobresaliente utilizada p'alimentase, y dos palpos sensoriales tan llargos como la probóscide. Los güeyos del inseutu pueden amás "ver" na rexón del infrarroxu cercanu detectando pol calor a les víctimes más que pola vista mesma.

• El tórax ta especializáu para movese, yá que a él amiéstense los trés pares de pates y el par d'ales.

• L'abdome contién los órganos especializaos para la dixestión y para el desarrollu de los güevos nel casu de les femes. En alimentándose, l'abdome del mosquitu aumenta considerablemente de tamañu.

Los Anopheles pueden estremase d'otros xéneros al traviés de los sos palpos, o pola presencia d'escames sobro les ales. Anque ensin dulda, la meyor mena d'estremalu fácilmente ye reparando la so postura en reposu, yá que disponen el so abdome de forma empinada, en contraposición col abdome paralelu a la superficie de reposu que se repara n'otros xéneros.

Los mosquitos adultos suelen apariase a los pocos díes d'eclosionar de la pupa. Na mayoría d'especies, los machos xúnense formando ensames, xeneralmente escontra l'atapecer, y les femes esnales dica estos pa copular con unu o más machos.

Los machos nun suelen vivir más d'una selmana, mientres la cual aliméntense de néctar y d'otres fontes d'azucre. Les femes, amás del azucre precisen una fonte de proteínes pa desenvolver los güevos: el sangre. Tres una ingesta de sangre, la fema reposa unos díes realizando la dixestión mientres los güevos se desendolquen colos nutrientes estrayíos. En 2-3 díes, los güevos yá tán lo suficientemente desenvueltos como pa poder ser depositaos. Tres la friega, el ciclu vuelve repitise hasta la muerte de la fema, que socede a los 7-14 díes (o más, en cautividá).

Entender la bioloxía del Anopheles puede ayudar a entender cómo se tresmite la malaria y puede polo tanto ayudar nel diseñu d'estratexes de control más eficaces. Dellos factores qu'afecten la capacidá del mosquitu de tresmitir la malaria son la so innata susceptibilidá al Plasmodium, la disponibilidá d'hospedadores de los qu'alimentase, la so llonxevidá y factores que repercuten nella, susceptibilidá a insecticides, esistencia de zones de friega, etc.

Non tolos Anopheles son tresmisores del plasmodiu causante de la malaria, una y bones esti nun se desenvuelve bien (o nada) nel so interior en toles especies (o inclusive n'individuos d'una especie na que sí se desenvuelve). Esperimentalmente escoyéronse cepes d'A. gambiae que encapsulan y maten al parásitu una vegada invadió la so paré estomacal; a la espera de conocer la base molecular d'esti procesu, especúlase cola lliberación de mosquitos modificaos xenéticamente que nun sían tresmisores de malaria, col enfotu de dir sustituyendo a les cepes monteses que sí lo son.

Sábese que n'África los tresmisores de malaria Anopheles gambiae y Anopheles funestus tienen una importante antropofilia, esto ye, que'l ser humanu ye la so principal fonte de nutrición. Por ello, poco puede remediase controlando hospedadores animales, salvu en casos de demostrada zoofilia per parte del vector.

La mayoría de Anopheles son crepusculares o nocherniegos. Dalgunos aliméntense dientro de los llares (endofagia), ente qu'otros prefieren alimentase fora d'ellos (exofagia), y tres la ingesta de sangre, dellos mosquitos prefieren reposar dientro (endofilia) y otros fuera (exofilia); sicasí, esti patrón de comportamientu camuda según la llocalización xeográfica, les carauterístiques del llar y les condiciones microclimáticas. L'usu de redes trescalaes d'insecticida dispuestes de forma qu'arrodien les cames, a manera de barrera física, y pantalles que torguen l'accesu del mosquitu al traviés de les ventanes, son dos métodos demostraos qu'amenorguen significativamente los casos de picadura de Anopheles del tipu nocherniegu-endofágico. Los mosquitos endofílicos pueden combatise meyor rociando l'interior d'insecticida. Sicasí, los exofágicos y los exofílicos contrólense meyor destruyendo les zones de cría.

Anque ye poco conocíu, n'Europa hubo tresmisión de la malaria hasta mediaos del sieglu XX y asina por casu, n'España la erradicación nun foi certificada hasta 1964. Nos países mediterráneos, les especies más importantes na tresmisión d'esa enfermedá fueron An. sacharovi, A. atroparvus y A. labranchiae. Les midíes de control qu'empleguen inseuticíes, como'l rociáu del interior de los llares o de les redes proteutores, son la vía principal de lluchar contra los mosquitos y, por tanto, contra la malaria. Sicasí, l'usu indiscrimináu ya inxustificáu d'estes sustancies, creó en munches situaciones una resistencia al insecticida (de forma similar a la resistencia a los antibióticos de delles bacteries patóxenes).

Delles especies d'Anopheles tamién pueden sirvir de vector a les filaries Dirofilaria immitis (causante de la dirofilariosis canina), Wuchereria bancrofti y Brugia malayi.

Al ser los únicos mosquitos que tresmiten malaria, el xéneru Anopheles tien una importancia médica global. Esti xéneru puede tresmitir Plasmodium falciparum, P. vivax, P. ovale y P. malariae. Recién estudios demostraron una quinta especie P. knowlesi, conocíu por infestar macacos (Macaca) puede infestar tamién a humanos.

Delles especies de Anopheles pueden tresmitir viérbenes filiares de Wuchereria bancrofti, Brugia malayi y Brugia timori que causen filariasis linfática n'humanos, siendo W. bancrofti la de mayor prevalencia y distribución. B. Timori sábese que solo s'atopa nes islles d'Indonesia del Este, afecta a un millón de persones y el so únicu vector ye A. barbirostris. B. timori carauterízase por ser rural una y bones los criadorios d'A. barbirostris allúguense n'árees de cultivos d'arroz. B. malayi, sicasí afecta a 12 millones de persones y ye tresmitíu por Anopheles spp. Los criadorios d'esti vector tán venceyaos con cuerpos d'agua duce en sitios rurales. W. bancrofti afecta a más de 100 millones de persones, Anopheles spp.es el principal vector n'África, Nueva Guinea y partes del sur d'Asia. Una de les causes que seya tan prevalente, ye que puede ser tresmitida non solo por Anopheles spp., sinón tamién por Aedes y Culex.^[1]

Amás d'estos parásitos, atopóse qu'Anopheles tresmite alredor de 20 virus, unu d'ellos el causante de la fiebre d'O'nyong'nyong, asociáu al complexu A. gambiae y A. funestus.^[2]

Los métodos de control n'Anopheles concentráronse nos distintos estadios del ciclu de vida del mosquitu pa menguar la so población. Pal estadiu de bárabu, los más comunes métodos son l'usu de reguladores de crecedera. Estos pueden ser pyriproxyfen y Bacilulus thuringiensis var. Israelensis. La so aplicación ye direuta nos criadorios. Usáronse tamién pexes predadores de bárabos pertenecientes a les especies Gambusia.

La mayoría de los métodos de control desenvolviéronse escontra mosquitos adultos. El sudo d'insecticides residuales dientro de cases y toldos trescalaos con insecticides son los principales métodos usaos contra Anopheles cita. L'usu d'insecticides residuales ye ampliu y consiste n'aplicar sobro parés, techos y pisos, DDT foi llargamente usáu con esi métodu Los mosquiteros nes cames son barreres físiques que torguen el contautu del vector col ser humanu, amás que s'atopen trescalaes con insecticida. Estes barreres pudieron amenorgar la morbilidad en neños hasta un 50% y la so mortalidá en 20%-30%.

Wikispecies tien un artículu sobre Anopheles.

• Wikimedia Commons acueye conteníu multimedia sobre Anopheles.
• Información xenómica y biolóxica de Anopheles (n'inglés)
• CDC - National Center for Infectious Diseases, Division of Parasitic Diseases; Anopheles Mosquitos
• Carta mundial con distribución de delles sp. de Anopheles
• 8 datos interesantes sobro los mosquitos