Kappeler Milchsuppe
D Chappeler Milchsuppe isch d Suppe, wo im 1529i bim Fride vo Chappel luut de Legände d Zürcher und d Innerschwyzer Truppe gmäinsam gchochet händ. D Zürcher hegid Brot ghaa, und d Innerschwyzer Milch, und zäme händs drum an Topf uufgschtellt, genau uf de Gränze zwüsched de Kantön Züri und Zug, und det drus zäme die Suppe ggässe. Hüt schtaat bi Ebertschwil am Albis uf de Kantonsgränze de Milchsuppeschtäi, am Ort, wo de Topf söll gschtande sii.