Karatsjai-Tsjerkessië

Republiek van Karatsjai-Tsjerkessië Къарачай-Черкес Республика Къэрэшей-Шэрджэс Республикэ
Die ligging van Karatsjai-Tsjerkessië in Rusland.
Politieke status
Land	Russiese Federasie
Federale distrik	Suidelike
Ekonomiese streek	Noord-Kaukasiese
Stigting	9 Januarie 1957
Regering
Hoofstad	Tsjerkessk
Leier	Rasjid Temrezof
Amp	President
Wetgewer	Volksraad
Bevolking
Sensus	2010
Totaal	477 859
Volgorde	73ste
Digtheid	33,89/km2
Stedelik	43,4%
Plattelands	56,6%
Statistiek
Oppervlakte	14 100 km2
Volgorde	77ste
Tydsone	UTC+04:00
Registrasienommer	09
Amptelike tale	Russies, Abazyns, Kabardies, Karatsjai-Balkaries, Nogai
Webtuiste	http://www.kchr.info/
Wapen en vlag
Portaal    Rusland

Die Republiek van Karatsjai-Tsjerkessië (Russies: Карача́ево-Черке́сская респу́блика, Karatsjaewo-Tsjerkesskaja Respoeblika; Karatsjai-Balkaries: Къарачай-Черкес Республика; Kabardies: Къэрэшей-Шэрджэс Республикэ) is ’n republiek (’n deelgebied) van Rusland.

Die republiek is 14 100 km² groot en grens aan Krasnodar-krai, Kabardino-Balkarië, Stawropol-krai en Georgië. Daar is sowat 130 mere. Van die belangrikste riviere is die Aksaoet, Bolsjaja Laba, Koeban en Koema. Sowat 80% van die landskap is bergagtig. Die hoogste punt is Berg Elbroes, wat 5 642 m hoog is.

Van Karatsjai-Tsjerkessië se belangrikste natuurlike hulpbronne sluit in goud, steenkool en klei.

Die Karatsjai-Tsjerkessiese Outonome Oblast is op 12 Januarie 1922 gestig. In 1926 is dit opgedeel in die Karatsjai- Outonome Oblast en die Tsjerkessiese Nasionale Distrik. Laasgenoemde se status is in 1928 verhoog tot dié van outonome oblast. In 1943 is die Karatsjai- Outonome Oblast afgeskaf en sy mense na Kazachstan en Oezbekistan verban nadat hulle beskuldig is van samewerking met die Nazi's. Die grootste deel van die streek is verdeel tussen Stawropol-krai en Georgië.

Die oorblywende deel, wat deur Tsjerkessiërs bewoon is, was bekend as die Tsjerkessiese Outonome Oblast tot op 9 Januarie 1957, toe dit weer die Karatsjai-Tsjerkessiese Outonome Oblast met sy vorige grense geword het ná die rehabilitasie van die Karatsjai. Op 3 Julie 1991 is die outonome oblast verhef tot die Outonome Sosialistiese Sowjet-republiek van Karatsjai-Tsjerkessië. Met die verbrokkeling van die Sowjetunie in Desember 1992 is die woorde "Outonome Sosialistiese Sowjet-" uit die naam gelaat.

Volgens die 2002-sensus is die grootste bevolkingsgroep die Karatsjais (38,5%), gevolg deur die Russe (33,6%) en die Tsjerkessiërs (11,3%).

Die republiek is bekend as die tuiste van, toe dit gebou is, die grootste teleskoop ter wêreld, ’n baie groot radioteleskoop (600 meter in deursnee), en die Spesiale Astrofisiese Sterrewag van die Russiese Akademie vir Wetenskap. Albei is geleë aan die oewers van die Zelentsjoek-rivier, tussen die dorpe Zelentsjoekskaja en Archiz.

Hierdie artikel is merendeels vertaal vanaf die Engelse Wikipedia-artikel en:Karachay-Cherkessia