George Fox

George Fox (* Julie 1624, † 13 Januarie 1691) was 'n Engelse Dissenter (religieus-andersdenkende) en stigter van die Genootskap van Vriende, algemeen bekend as die Kwakers of Vriende.

Fox, wat as die seun van 'n wewer in Leicestershire gebore is, het in 'n tyd van groot maatskaplike omwentelinge en oorlog geleef. Met sy voorstel vir 'n ongewone en onwrikbare benadering tot die Christelike geloof het hy in opstand gekom teen godsdienstige en wêreldlike owerhede. As andersdenkende Christelike preker het Fox dwarsdeur Brittanje gereis en was dikwels blootgestel aan religieuse vervolging deur die owerheid wat sy oortuigings met wantroue bejeën het.

In 1669 het Fox met Margaret Fell getrou, die weduwee van een van sy meer welvarende ondersteuners en 'n leidende Vriend. Fox het sy predikwerk vervolgens grootliks uitgebrei en besoeke aan Noord-Amerika en die Lae Lande gebring. Tussen sy reise is hy meer as een jaar in 'n tronk aangehou. Die laaste dekade van sy lewe het Fox in Londen deurgebring waar hy die uitbreiding van die Kwakerbeweging georganiseer het.

Terwyl sy godsdienstige beweging deur sommige geringgeskat is, het ander soos William Penn en Oliver Cromwell Fox met respek bejeën. Fox het sy laaste rusplek in Quaker Gardens, Islington, Londen gevind.