漢莎同盟
漢莎同盟（德文：Hanse；拉丁文：Hansa Teutonica或Liga Hanseatica）係12到13世紀中歐嘅神聖羅馬帝國同條頓騎士團部份城市之間形成嘅商業、政治同盟，以德意志北部城市為主。「漢莎」嘅德文意思為「公所」或者「會館」，最早係指從南海（須德海）到芬蘭、瑞典同挪威嘅一班商人同佢等嘅貿易船隻。漢莎同盟喺12世紀中期逐漸形成，14世紀晚期到15世紀早期達到鼎盛時期，加盟城市最多達到160個。1367年，漢莎同盟成立以呂碧克（Lübeck）為首嘅領導機構，吸引到漢堡、科隆、不來梅等大城市嘅富商、貴族參加，重擁有埋自己嘅武裝同金庫。1370年，漢莎同盟擊敗丹麥，訂立《舒特留崇德條約》（德文：Friede von Stralsund），從此壟斷波羅的海地區貿易，商站遍及西起倫敦，東到諾夫哥羅德嘅沿海地區，實力雄厚。15世紀中葉之後，隨著英、俄、尼德蘭等國家嘅工商業發展，加上新航路嘅開闢，漢莎同盟由盛轉衰，1669年解散。
今日德國嘅載旗航空公司漢莎航空（Lufthansa）裡面嘅「漢莎」，指嘅就係漢莎同盟。
 |
